ഹൈദരാബാദ് : കോളേജിലെ ക്ലാസ് മുറികളിൽ നിസ്ക്കരിക്കണമെന്ന മുസ്ലീം പെൺകുട്ടികളുടെ ആവശ്യം നിരസിച്ച് കോളേജ് അധികൃതർ . ഹൈദരാബാദ് സന്തോഷ് നഗറിലെ കെ വി രംഗ റെഡ്ഡി ഡിഗ്രി കോളേജ് ഫോർ വിമൻ മാനേജ്മെന്റാണ് ക്ലാസ് മുറികളിൽ നിസ്കരിക്കാനുള്ള അനുമതി നിഷേധിച്ചത് . ഇതേ തുടർന്ന് മുസ്ലീം വിദ്യാർത്ഥികൾ കോളേജിൽ പ്രതിഷേധം നടത്തുകയാണ്.
ഇതിന്റെ ദൃശ്യങ്ങൾ സോഷ്യൽ മീഡിയ പ്ലാറ്റ്ഫോമുകളിൽ പ്രചരിക്കുന്നുണ്ട്. “ഞങ്ങൾക്ക് നിസ്കാരത്തിന് അനുമതി വേണം” എന്ന മുദ്രാവാക്യം ഉയർത്തിയാണ് പ്രതിഷേധം . മുസ്ലീം വിദ്യാർത്ഥികളെ അവരുടെ വിശ്വാസം പിന്തുടരുന്നതിൽ നിന്ന് വിലക്കുന്നില്ലെന്നും എന്നാൽ മതം പഠനവുമായി കൂട്ടിക്കുഴയ്ക്കാൻ അനുവദിക്കില്ലെന്നും കോളേജ് മാനേജ്മെന്റ് വ്യക്തമാക്കി.
ആറ് മാസം മുമ്പ് ശിരോവസ്ത്രം ധരിക്കാൻ അനുവദിക്കുന്നില്ലെന്ന് പറഞ്ഞും മുസ്ലീം വിദ്യാർത്ഥികൾ മാനേജ്മെൻ്റിനെതിരെ പ്രതിഷേധിച്ചിരുന്നു . സ്ഥാപനത്തിലെ ക്ലാസ് മുറികളിൽ തങ്ങൾ നിസ്ക്കരിക്കാറുണ്ടെന്നും അടുത്തിടെയാണ് ജീവനക്കാർ ഇതിനെ എതിർത്തതെന്നും വിദ്യാർത്ഥിനികൾ പറഞ്ഞു.
