കോഴിക്കോട്: കുന്ദമംഗലത്ത് ജപ്പാൻ കുടിവെള്ള പദ്ധതിയുടെ പൈപ്പ് പൊട്ടി. കുന്ദമംഗലം പത്താം മൈലിൽ ദേശീയപാതയിലാണ് പൈപ്പ് പൊട്ടിയത്. പൈപ്പ് പൊട്ടിയതോടെ ദേശീയപാതയിൽ ഗതാഗത തടസ്സപ്പെട്ടു. പൈപ്പിലെ ജലം വളരെ ഉയരത്തിൽ പൊങ്ങുകയും റോഡ് തകരുകയും ചെയ്തു.
വയനാട്ടിലേക്കുള്ള പ്രധാനപാത ആയതുകൊണ്ട് തന്നെ വലിയ ഗതാഗത കുരുക്കാണ് പ്രദേശത്തുണ്ടായത്. ഇത്തരത്തിൽ ആറ് തവണ പ്രദേശത്ത് പൈപ്പ് പൊട്ടി ഗതാഗതം തടസപ്പെട്ടുവെന്ന് നാട്ടുകാർ പറഞ്ഞു.
വൈദ്യുതി ലൈനില് തട്ടുന്ന തരത്തില് വെള്ളം ഉയര്ന്നതിനാല് കെഎസ്ഇബി അധികൃതരെത്തി ലൈന് ഓഫാക്കിയിരുന്നു. കുന്നമംഗലം പോലീസും സ്ഥലത്തെത്തി സമീപത്തായി ഡിവൈഡറുകള് സ്ഥാപിച്ചു. വിവരം അറിയിച്ചിട്ടും വാട്ടര് അതോറിറ്റിയിലെ ഉദ്യോഗസ്ഥര് സ്ഥലത്ത് എത്താത്തത് നാട്ടുകാരില് പ്രതിഷേധത്തിനിടയാക്കിയിരുന്നു.