ബെംഗളൂരു: മനുഷ്യനെ ബഹിരാകാശത്തെത്തിക്കാനുള്ള നിർണായക ദൗത്യമായ ഗഗൻയാനിൽ മലയാളി സാന്നിധ്യവും. നാല് ഇന്ത്യൻ ബഹിരാകാശ സഞ്ചാരികളാണ് ദൗത്യത്തിൽ പങ്കാളികളാകുന്നത്. ഇതിൽ ഒരാൾ മലയാളിയാണെന്നാണ് പുറത്തു വരുന്ന റിപ്പോർട്ടുകൾ. ഇവരുടെ പേര് വിവരങ്ങൾ പ്രധാനമന്ത്രി നാളെ തിരുവനന്തപുരത്ത് എത്തുമ്പോൾ പ്രഖ്യാപിക്കും. ബഹികാരാശ സഞ്ചാരികൾ ഇന്ത്യയിൽ പരിശീലനം തുടരുകയാണ്.
മനുഷ്യനെ ബഹിരാകാശത്തെത്തിക്കുന്ന പ്രഥമ ദൗത്യമാണ് ഗഗൻയാൻ. വിക്ഷേപണം പൂർത്തീയാകുന്നതോടെ അമേരിക്ക, റഷ്യ, ചൈന, എന്നിവയ്ക്ക് ശേഷം മനുഷ്യനെ ബഹിരാകാശത്തെത്തിക്കുന്ന ലോകത്തിലെ നാലാമത്തെ രാജ്യമായും ഇന്ത്യ മാറും. ഈ വർഷം അവസാനത്തോടെയായിരിക്കും ഗഗൻയാന്റെ വിക്ഷേപണം നടത്തുകയെന്ന് ഐഎസ്ആർഒ ചെയർമാൻ എസ്. സോമനാഥ് അറിയിച്ചിരുന്നു.
