ഇന്ത്യൻ ക്രിക്കറ്റ് ടീം മുൻ ക്യാപ്റ്റൻ മഹേന്ദ്ര സിംഗ് ധോണിയുടെ ജീവിതകഥ അറിയാത്തവർ ചുരുക്കമായിരിക്കും. അന്താരാഷ്‌ട്ര ക്രിക്കറ്റിൽ അദ്ദേഹം കളിച്ചുകൊണ്ടിരുന്ന സമയത്ത് അദ്ദേഹത്തോടുള്ള അതേ ആരാധന തന്നെയാണ് ഇപ്പോഴും ആരാധകർക്കിടയിലുള്ളത്. ഇതിന്റെ നേർക്കാഴ്ച കാണിക്കുന്ന ദൃശ്യങ്ങളാണ് സമൂഹമാദ്ധ്യമങ്ങളിൽ ഇപ്പോൾ വൈറലാവുന്നത്.
ഞായറാഴ്ച നടന്ന ഇന്ത്യ- ഇംഗ്ലണ്ട് റാഞ്ചി ടെസ്റ്റിനിടെ ഇന്ത്യൻ റെയിൽവേയിൽ ധോണിക്ക് ജോലി ലഭിച്ചതിന്റെ അപ്പോയിന്റ്മന്റ് ലെറ്റർ പ്രദർശനം ചെയ്തതിന്റെ ദൃശ്യങ്ങളാണ് സമൂഹമാദ്ധ്യമങ്ങളിൽ ഇടം നേടിയിരിക്കുന്നത്. ഇന്ത്യയ്‌ക്കായി കളിക്കുക എന്ന സ്വപ്‌നത്തിൽ എത്തിച്ചേരുന്നതിന് മുമ്പ് ഇന്ത്യൻ റെയിൽവേയിൽ ടിടിആർ ആയാണ് അദ്ദേഹം ജോലി ചെയ്തിരുന്നത്. ടിടിആർ ആയി ജോലി ചെയ്യുന്നതിനിടയിലും ക്രിക്കറ്റെന്ന തന്റെ സ്വപ്‌നം സാക്ഷാത്കരിക്കുന്നതിനായി പരിശീലനം തുടർന്നു കൊണ്ടേയിരുന്നു. റെയിൽവേയിൽ അദ്ദേഹത്തിനെ ടിടിആർ ആയി നിയമിച്ചുകൊണ്ടുള്ള ഈ കത്ത് ക്രിക്കറ്റിന്റെ ചരിത്രത്തിൽ തന്നെ ഒരു സുപ്രധാന ഭാഗമാണ്. കായിക ലോകത്തേക്കുള്ള അദ്ദേഹത്തിന്റെ യാത്ര ഇതിലൂടെ ആരംഭിക്കുന്നു, എന്ന തരത്തിലുള്ള കമ്മന്റുകളും സമൂഹമാദ്ധ്യമങ്ങളിൽ പ്രചരിക്കുന്ന ചിത്രത്തിന് ലഭിച്ചു.
The first appointment letter of MS Dhoni. (JioCinema). pic.twitter.com/nrr53fDbhB
— Mufaddal Vohra (@mufaddal_vohra) February 25, 2024
2011ൽ ഇന്ത്യക്ക് ലോകക്കപ്പ് നേടി തന്ന ധോണിയുടെ സിക്‌സ് ആരാധകർക്ക് ഒരിക്കലും മറക്കാൻ സാധിക്കാത്തതാണ്. ക്രിക്കറ്റിലെ ആ ഐതിഹാസിക നിമിഷം, റെയിൽവേ ടിക്കറ്റ് കളക്ടറായി ജോലി ചെയ്ത ഒരാൾ എന്നതിൽ നിന്നും ‘ക്യാപൻ കൂൾ’ എന്ന സ്ഥാനത്തേക്ക് അദ്ദേഹത്തെ എത്തിക്കുകയും ആരാധകരുടെ മനസിൽ എക്കാലവും സ്ഥാനം ഊട്ടിഉറപ്പിക്കുന്നതിനും സാധിച്ചു.
