ഭാരതത്തിന്റെ പ്രഥമ ബഹിരാകാശ ദൗത്യമായ ഗഗൻയാനിലെ മലയാളിത്തിളക്കമായ പ്രശാന്ത് ബാലകൃഷ്ണൻ നായരാണ് ഇപ്പോൾ സമൂഹമാദ്ധ്യമങ്ങളിൽ ഇടം നേടുന്നത്. പലക്കാട് നെന്മാറ സ്വദേശിയായ പ്രശാന്ത് ബി നായരെ കുറിച്ചറിയാനുള്ള മലയാളികളുടെ വ്യഗ്രത അവസാനം എത്തിച്ചേർന്നത് നടി ലെനയുമായുള്ള വിവാഹത്തിലായിരുന്നു. ഏവരും ഒരു ആശ്ചര്യത്തോടെയാണ് ഈ വാർത്ത ഏറ്റെടുത്തത്. ഇതിനിടയിൽ ഇരുവരുടെയും വിവാഹത്തിൽ പങ്കെടുത്തതിന്റെ ചിത്രം ഷെഫ് സുരേഷ് പിള്ളയും ഇപ്പോൾ പങ്കുവച്ചതോടെ സമൂഹമാദ്ധ്യമങ്ങളിൽ ലെന- പ്രശാന്ത് ബി നായർ വിവാഹം തരംഗം സൃഷ്ടിക്കുകയാണ്.
” എന്റെ പ്രിയപ്പെട്ട രണ്ടു കുട്ടുകാർ! ഏറ്റവും അടുത്ത കുടുംബ സുഹൃത്തുക്കളുമായി, ബെംഗളൂരുവിൽ ലളിതവും മനോഹരവുമായ നടന്ന വിവാഹത്തിൽ പങ്കെടുക്കാനായി! ഇരുവർക്കും ആശംസകൾ നേരുന്നു”.- സുരേഷ് പിള്ള സാമൂഹമാദ്ധ്യമമായ ഫേസ് ബുക്കിൽ കുറിച്ചു. വിവാഹ ദിവസം ഇരുവർക്കൊപ്പം നിൽക്കുന്നതിന്റെ ഫോട്ടോയും സുരേഷ് പങ്കുവച്ചിട്ടുണ്ട്.
ഇന്നലെയാണ് മലയാളികളെ ഞെട്ടിച്ചുകൊണ്ട് ലെന വിവാഹിതയായ കാര്യവും വരൻ പ്രശാന്ത് ബി നായരാണെന്നുള്ള കാര്യവും വെളിപ്പെടുത്തിയത്. ഇക്കഴിഞ്ഞ ജനുവരി 17നാണ് പ്രശാന്ത് ബി നായരുമായി നടിയുടെ വിവാഹം കഴിഞ്ഞത്. ബഹിരാകാശ യാത്രികരെ പ്രധാനമന്ത്രി പ്രഖ്യാപിച്ചതിന് ശേഷം ഈ വിവരം പുറത്തറിയിക്കാനാണ് താൻ കാത്തിരുന്നതെന്നും താരം ഇന്നലെ വെളിപ്പെടുത്തിയിരുന്നു.