താരൻ പലരുടെയും ഒരു ജന്മശത്രുവായിരിക്കും. അസഹനീയമായ തലച്ചൊറിലായിരിക്കും താരൻ ബാധിച്ചാൽ നേരിടേണ്ട പ്രധാന പ്രശ്നങ്ങളിലൊന്ന്. എന്നാൽ എല്ലാ തലച്ചൊറിച്ചിലും താരനാണെന്ന് കരുതി വിട്ടുകളയേണ്ട. ശിരോചർമ്മത്തെ ബാധിക്കുന്ന ഒരു രോഗമാണ് സ്കാൽപ് സോറിയാസിസ്. ഇത് ബാധിക്കുമ്പോഴും തലയിൽ അസഹനീയമായ ചൊറിച്ചിൽ അനുഭവപ്പെട്ടേക്കാം.
ശിരോചർമ്മം വരണ്ടതാകുമ്പോൾ ഡെഡ് സെൽസ് ഉയർന്നു വരുന്നതാണ് താരൻ. എന്നാൽ ശിരോചർമ്മത്തിൽ കഠിനമായ ചൊറിച്ചിൽ അനുഭവപ്പെടുകയും പൊറ്റകൾ പോലെ തലയുടെ വിവിധയിടങ്ങളിൽ കാണപ്പെടുകയും ചെയ്യുന്ന രോഗമാണ് സ്കാൽപ് സോറിയാസിസ്. പൊറ്റകളിൽ നിന്നും രക്തസ്രാവം വരുന്നതും കഠിനമായ ചൊറിച്ചിലും വേദനയും സോറിയാസിസ് ബാധിച്ചവരിൽ കാണപ്പെടുന്നു. തലമുടിയും ശിരോ ചർമ്മവും വരണ്ടതാകുമ്പോഴാണ് ഇത് കൂടുതലായി ബാധിക്കുന്നത്.
ശിരോചർമ്മത്തിൽ പുതിയ കോശങ്ങൾ പെട്ടന്ന് രൂപപ്പെട്ട് പഴയതിനൊപ്പം അടിഞ്ഞു കൂടുന്നതാണ് സ്കാൽപ് സോറിയാസിസ് ഉണ്ടാകുന്നതിന്റെ പ്രധാന കാരണം. പിങ്ക്, വയലറ്റ്, ചുവപ്പ്, വെള്ള, മഞ്ഞ നിറങ്ങളിൽ ഈ പൊറ്റകൾ കാണപ്പെടുന്നു. ശിരോ ചർമ്മത്തിൽ തൊടുമ്പോൾ വീർത്തിരിക്കുകയും വേദന അനുഭവപ്പെടുകയും കഠിനമായ ചൊറിച്ചിൽ അനുഭവപ്പെടുകയും ചെയ്താൽ വൈദ്യസഹായം തേടുക. ചീര, സാൽമൺ, അയല, മത്തി, ഫലവർഗങ്ങൾ എന്നിവ ഈ രോഗം ബാധിച്ചവർ കഴിക്കാൻ പ്രത്യേകം ശ്രദ്ധിക്കണം.