പട്ന: പൗരത്വ ഭേദഗതി നിയമം നടപ്പാക്കിയത് കേന്ദ്രത്തിന്റെ ഭാഗത്ത് നിന്നുണ്ടായ അഭിനന്ദനാർഹമായ നീക്കമാണെന്നും, സിഎഎ ഒരിക്കലും മതന്യൂനപക്ഷങ്ങൾക്ക് എതിരല്ലെന്നും ബിജെപി എംപി രവിശങ്കർ പ്രസാദ്. ” പൗരത്വ ഭേദഗതി നിയമം നടപ്പിലാക്കിയ കേന്ദ്രസർക്കാരിനും പ്രധാനമന്ത്രി നരേന്ദ്രമോദിക്കും, ആഭ്യന്തരമന്ത്രി അമിത് ഷായ്ക്കും നന്ദി അറിയിക്കുകയാണ്. ദുരിതമനുഭവിക്കുന്ന മതന്യൂനപക്ഷങ്ങളെ സഹായിക്കാനാണ് ഈ നിയമം ലക്ഷ്യമിടുന്നത്.
പാകിസ്താൻ, അഫ്ഗാനിസ്ഥാൻ, ബംഗ്ലാദേശ് എന്നീ രാജ്യങ്ങളിൽ നിന്ന് മതപരമായ പീഡനം അനുഭവിക്കേണ്ടി വന്നതിനെ ഇന്ത്യയിലേക്ക് അഭയാർത്ഥികളായി എത്തേണ്ടി വന്ന ഹിന്ദുക്കളേയും പാഴ്സികളേയും, ക്രിസ്ത്യാനികളേയും, സിഖുകാരേയും ബുദ്ധ, ജൈന മതവിഭാഗങ്ങളിൽ പെട്ടവരേയും സഹായിക്കാനാണ് ഈ നിയമം ലക്ഷ്യമിടുന്നത്. വലിയ ദുരിതമനുഭവിച്ചാണ് അവർ ഈ രാജ്യങ്ങളിൽ നിന്നും ഇന്ത്യയിലെത്തിയത്. അവർക്കായി എല്ലാവിധ സൗകര്യങ്ങളും ഒരുക്കി നൽകുമെന്നും” രവിശങ്കർ പ്രസാദ് പറഞ്ഞു.
സിഎഎ നടപ്പാക്കിയത് വളരെ സന്തോഷം നൽകുന്ന കാര്യമാണെന്നും, അഭിനന്ദനങ്ങൾ അറിയിക്കുന്നതായും ബിഹാർ ഉപമുഖ്യമന്ത്രി വിജയ്കുമാർ സിൻഹ പറഞ്ഞു. പ്രധാനമന്ത്രി നരേന്ദ്രമോദിയും അമിത് ഷായും സ്വീകരിച്ച വളരെ നല്ല നടപടിയാണിത്. അയൽരാജ്യങ്ങളിൽ നിന്ന് ദുരിതമനുഭവിച്ച് ഇവിടേക്കെത്തിയവർക്ക് ഇന്ത്യയിലെത്തി പൗരത്വം നേടാനുള്ള അവസരമാണിതെന്നും” വിജയ്കുമാർ വ്യക്തമാക്കി.