മുംബൈ: ഐപിഎൽ ഒരുക്കങ്ങൾക്ക് തുടക്കമിട്ട് അഞ്ചുതവണ ചാമ്പ്യൻമാരായ മുംബൈ ഇന്ത്യൻസ്. പുതിയ ക്യാപ്റ്റനൊപ്പമാണ് പുതിയ സീസണ് ഒരുങ്ങുന്നത്. രണ്ടുവർഷത്തെ ഇടവേളയ്‌ക്ക് ശേഷം ക്യാപ്റ്റനായി മടങ്ങിയെത്തിയ ഹാർദിക്കാണ് ഐപിഎൽ ഒരുക്കത്തിന് തുടക്കം കുറിച്ചത്. ഡ്രസ്സിംഗ് റൂമിലെ പ്രാർത്ഥന ഏരിയയിൽ വിളക്കു തെളിച്ചും തേങ്ങ ഉടച്ചുമാണ് അവർ പരിശീലന ക്യാമ്പിന് തുടക്കമിട്ടത്. മലിംഗയും മുംബൈ ടീമിലേക്ക് മടങ്ങി വന്നിട്ടുണ്ട്.
ഹാര്‍ദിക്കിനെ മുഖ്യ പരിശീകന്‍ മാര്‍ക്ക് ബൗച്ചറും സപ്പോര്‍ട്ട് സ്റ്റാഫും ചേര്‍ന്നാണ് വരവേറ്റത്. തുടർന്ന് പൂജാ മുറിയില്‍ ഹാര്‍ദിക് വിളക്ക് തെളിച്ചു.മുഖ്യ പരിശീലകനായ മാർക്ക് ബൗച്ചർ നിലത്ത് തേങ്ങ ഉടച്ചു. ഇതിന് പിന്നാലെ പരസ്പരം ആശ്ലേഷിക്കുന്നതും കാണാം. വീ‍ഡിയോ പുറത്തുവന്നതിന് പിന്നാലെ ഒരു വിഭാഗം ഇതിനെ പരിഹസിച്ചും വിമർശിച്ചും രംഗത്തുവന്നു.
ഗുജറാത്ത് ടൈറ്റൻസിനെ ഒരു വട്ടം ചാമ്പ്യന്മാരാക്കിയ ഹാർദിക്ക് അവരെ കഴിഞ്ഞ സീസണിൽ ഫൈനലിലും എത്തിച്ചിരുന്നു. എന്നാൽ ചെന്നൈയ്‌ക്ക് മുന്നിൽ കീഴടങ്ങുകയായിരുന്നു. 22ന് തുടങ്ങുന്ന ഐപിഎല്ലില്‍ മുംബൈയുടെ ആദ്യ മത്സരം 24ന് ഗുജറാത്തുമായാണ്.ശുഭ്മാന്‍ ഗില്ലിന്റെ നായകനായുള്ള അരങ്ങേറ്റ സീസണാണ് ഇത്.
“>
Leave a Comment