രാജ്യത്തെ ആദ്യത്തെ അണ്ടർ വാട്ടർ മെട്രോ; പ്രവർത്തനം ആരംഭിച്ചു

കൊൽക്കത്ത: രാജ്യത്തെ ആദ്യത്തെ അണ്ടർ വാട്ടർ മെട്രോ പ്രവർത്തനമാരംഭിച്ചു. ഈ മാസം ആദ്യം പ്രധാനമന്ത്രി ഉദ്ഘാടനം നിർവ്വഹിച്ച വാട്ടർ മോട്രോ ഇന്ന് മുതലാണ് ജനങ്ങൾക്കായി തുറന്ന് കൊടുത്തത്. കൊൽക്കത്തയിലെ ഈസ്റ്റ്-വെസ്റ്റ് മെട്രോയിലെ ഹൗറ മൈതാനിയിൽ നിന്ന് രാവിലെ 7 മണിക്കാണ് ആദ്യ യാത്രക്കാരുടെ സംഘം പുറപ്പെട്ടത്.

അണ്ടർ വാട്ടർ മെട്രോയുടെ ഭാ​ഗമാകാൻ പുലർച്ചെ മുതൽ നിരവധി പേരാണ് മെട്രോസ്റ്റേഷനിൽ തടിച്ചു കൂടിയത്. ഹൗറ മൈതാനിനെ എസ്പ്ലനേഡുമായി ബന്ധിപ്പിക്കുന്ന മെട്രോ പാതയില്‍ നിന്നും 4.8 കിലോമീറ്റര്‍ ദൂരമാണ് മെട്രോ ടണല്‍ വരുന്നത്. ഇതിൽ 520 മീറ്റർ ദൂരമാണ് അണ്ടര്‍വാട്ടര്‍ മെട്രോയായി ഹൂഗ്ലി നദിയുടെ അടിയിലൂടെ പോകുന്നത്. നദിയില്‍ 30 മീറ്റര്‍ താഴ്ചയിലാണ് മെട്രോയുടെ ടണല്‍.

സമുദ്രനിരപ്പിൽനിന്ന് ഏറ്റവും താഴെയായി സ്ഥിതിചെയ്യുന്ന മെട്രോ സ്‌റ്റേഷനാണ് ഹൗറ. ഉപരിതലത്തിൽനിന്ന് 33 മീറ്റർ താഴ്ചയിലാണ് സ്റ്റേഷനുള്ളത്. ഹൂഗ്ലി നദിയുടെ അടിത്തട്ടിലുള്ള തുരങ്കങ്ങൾ എഞ്ചിനീയറിംഗ് വിസ്മയമായി കണക്കാക്കപ്പെടുന്നു. അണ്ടർ ഗ്രൗണ്ടിലുള്ള മൂന്നെണ്ണമടക്കം ആറ് സ്‌റ്റേഷനുകളാണ് പാതയിലുള്ളത്. ഹൗറ മൈതാൻ, ഹൗറ സ്‌റ്റേഷൻ കോംപ്ലക്‌സ്, ബിബിഡി ബാഗ് (മഹാകരൺ) എന്നിവയാണ് ഈസ്റ്റ് -വെസ്റ്റ് മെട്രോയുടെ ഗ്രീൻ ലൈനിലെ മൂന്ന് സ്‌റ്റേഷനുകൾ. കൊൽക്കത്ത മെട്രോ റെയിൽ കോർപ്പറേഷൻ ലിമിറ്റഡിന് (KMRCL) ആയിരുന്നു നിർമ്മാണ ചുമതല.

The first #HowrahMaidan-bound #Metro from #Esplande is about to start. History is about to be made….. pic.twitter.com/ZttkKkcfEj

— Metro Railway Kolkata (@metrorailwaykol) March 15, 2024