തെലുങ്ക് താരം രാം ചരൺ നായകനാകുന്ന ഏറ്റവും പുതിയ ചിത്രമാണ് ‘ഗെയിം ചേഞ്ചർ’. ശങ്കർ ഷൺമുഖമാണ് ചിത്രം സംവിധാനം ചെയ്യുന്നത്. ഇപ്പോഴിതാ ചിത്രത്തിന്റെ ഒരു ലൊക്കേഷൻ സ്റ്റിൽ പുറത്തുവന്നിരിക്കുകയാണ്. രാം ചരണിന്റെ ലൊക്കേഷൻ സ്റ്റില്ലാണ് പുറത്തുവന്നിരിക്കുന്നത്. സമൂഹമാദ്ധ്യമങ്ങളിൽ പ്രചരിക്കുന്ന ചിത്രം ആരാധകർ ഏറെ ആവേശത്തോടെയാണ് ഏറ്റെടുത്തിരിക്കുന്നത്.
രാം ചരൺ ഇതുവരെ ചെയ്ത കഥാപാത്രങ്ങളെ അപേക്ഷിച്ച് ഏറെ വ്യത്യസ്തമായൊരു ലുക്കിലാണ് താരം എത്തുന്നത്. കിയാര അദാനിയാണ് ചിത്രത്തിലെ നായിക. സിനിമയുടെ ചിത്രീകരണം അടുത്തിടെയാണ് ആരംഭിച്ചത്. മാർച്ച് 15നാണ് രാം ചരൺ സിനിമയിൽ ജോയിൻ ചെയ്തത്. ഈ വർഷം ആദ്യമായിരുന്നു ചിത്രത്തിന്റെ പ്രഖ്യാപനം നടന്നത്. ഒരു പൊളിറ്റിക്കൽ ആക്ഷൻ ത്രില്ലറായാണ് ചിത്രം ഒരുങ്ങുന്നത്.
എസ്ജെ സൂര്യയും ചിത്രത്തിൽ ഒരു പ്രധാന വേഷത്തിൽ എത്തുന്നുണ്ട്. കാർത്തിക്ക് സുബ്ബരാജാണ് തിരക്കഥ ഒരുക്കുന്നത്. ദിൽ രാജു, സിരീഷ് എന്നിവർ ചേർന്നാണ് ചിത്രം നിർമ്മിക്കുന്നത്. ഗെയിം ചേഞ്ചർ ഈ വർഷം തന്നെ തിയേറ്ററുകളിലെത്തും. സമുദ്രക്കനി, ജയറാം, നാസർ, നവീൻ ചന്ദ്ര, അഞ്ജലി എന്നിവരും പ്രധാന കഥാപാത്രങ്ങളായി എത്തുന്നുണ്ട്.