കണ്ണൂർ: കേരളത്തിലെ മുൻ മുഖ്യമന്ത്രിമാരുടെ മക്കൾ ഇനിയും ബിജെപിയിലേക്ക് വരുമെന്ന് പത്മജ വേണുഗോപാൽ. ബിജെപിയിലേക്ക് വരാൻ ആഗ്രഹിക്കുന്നവരെ ഇനിയും കൊണ്ടുവരുമെന്നും അവരെ കുറിച്ച് ഇപ്പോൾ പുറത്തു പറയാനാകില്ലെന്നും പത്മജ പറഞ്ഞു. കണ്ണൂരിൽ എൻഡിഎ തിരഞ്ഞെടുപ്പ് ഓഫീസിന്റെ ഉദ്ഘാടനത്തോടനുബന്ധിച്ച് നടന്ന പരിപാടിയിൽ സംസാരിക്കുകയായിരുന്നു പത്മജ വേണുഗോപാൽ.
‘കോൺഗ്രസിൽ നിന്നും ഒരുപാട് അപമാനങ്ങൾ അനുഭവിച്ചിട്ടുണ്ട്. എനിക്ക് ഇവിടെ നിൽക്കുന്നതിൽ തന്നെ വളരെയധികം സന്തോഷമാണ്. കാരണം എല്ലാ ഭാഗങ്ങളിലും വനിതാ പ്രവർത്തകരെയാണ് എനിക്ക് കാണാനാകുന്നത്. എന്നാൽ ഇത്രയും കാലം കോൺഗ്രസിന്റെ ഒരു വനിതാ നേതാവിനെ എങ്കിലും നിങ്ങൾ മുൻനിരയിൽ കണ്ടിട്ടുണ്ടോ… കെ കരുണാകരന്റെ മകളായത് കൊണ്ട് മാത്രം രണ്ടാം നിരയിലെ മൂലയ്ക്ക് ഒരു കസേരയിട്ട് തരും.
കോൺഗ്രസ് എല്ലായ്പ്പോഴും സ്ത്രീകളെ അപമാനിക്കുന്നു, വേദനിപ്പിക്കുന്നു, സങ്കടപ്പെടുത്തുന്നു. ഇതെല്ലാം സഹിച്ചാണ് ഞാൻ കോൺഗ്രസിൽ നിന്നത്. പ്രധാനമന്ത്രി നരേന്ദ്രമോദി തന്നെയാണ് എന്നെ ബിജെപിയിലേക്ക് ആകർഷിച്ചത്. എന്തുകൊണ്ട് ബിജെപി എന്ന് എല്ലാവരും എന്നോട് ചോദിച്ചു. ഞാൻ ബിജെപിയെ സ്നേഹിക്കുന്നു. ബഹുമാനിക്കുന്നു അതിനാലാണ് ഞാൻ ബിജെപിയിലെത്തിയത്. ഏതൊരു പാർട്ടിയ്ക്കും വേണ്ടത് നല്ലൊരു നേതൃത്വമാണ്. അത് ബിജെപിയ്ക്കുണ്ട്. സിപിഎമ്മിനും കോൺഗ്രസിനും ഇല്ലാത്തതും അത് തന്നെയാണ് – പത്മജ വേണുഗോപാൽ പറഞ്ഞു.
