ഗ്യാസ് സ്റ്റൗവും ഇൻഡക്ഷൻ കുക്കറുകളും അടുക്കളയിലെ നിത്യോപയോഗ വസ്തുക്കളാണ്. ഇവ രണ്ടും ഉപയോഗിക്കാതെ പാചകം ചെയ്യുന്ന കാര്യം ഇന്നത്തെ തലമുറയ്ക്ക് ആലോചിക്കാൻ കൂടി സാധിക്കില്ല. എന്നാൽ പാചകത്തിന് ശേഷം സ്റ്റൗ വൃത്തിക്കേടായി കിടക്കുന്നത് പലരെയും മടുപ്പിക്കുന്ന കാര്യമാണ്. സ്റ്റവുകൾ വൃത്തിയാക്കാൻ ബുദ്ധിമുട്ടുകൾ നേരിടുന്നുണ്ടെങ്കിൽ ഇനി വിഷമിക്കേണ്ട. ഈ നുറുങ്ങുവിദ്യകൾ പരീക്ഷിക്കാം.
സ്റ്റവിൽ നിന്നും ബർണർ ഊരി മാറ്റിവയ്ക്കുക. ഇതിന് ശേഷം ഗ്രേറ്റുകളും പ്ലേറ്റുകളും സോപ്പ് ലിക്വിഡ് ചേർത്ത ചെറുചൂടുവെള്ളത്തിൽ മുക്കി വയ്ക്കുക. കുറച്ചു നേരത്തിന് ശേഷം ഒരു ബ്രഷ് ഉപയോഗിച്ച് വൃത്തിയാക്കി കൊടുക്കുക. സ്റ്റൗവിലുള്ള അഴുക്കുകൾ നീക്കം ചെയ്യുന്നതിനായി ചെറു ചൂടുവെള്ളത്തിൽ അൽപം ബേക്കിംഗ് സോഡയും സോപ്പും കലർത്തിയ ശേഷം ബ്രഷോ തുണിയോ ഉപയോഗിച്ച് വൃത്തിയാക്കാം. ലോഹവസ്തുക്കൾ കൊണ്ട് സ്റ്റൗവിൽ ചുരണ്ടുന്നത് പരമാവധി ഒഴിവാക്കാൻ ശ്രദ്ധിക്കണം.
ഇലക്ട്രിക് ഗ്ലാസ് കുക്ക്ടോപ്പറുകൾ വൃത്തിയാക്കുമ്പോൾ ഉപരിതലം ചൂട് മാറിയതിന് ശേഷം മാത്രം വൃത്തിയാക്കുക. നനഞ്ഞ തുണി ഉപയോഗിച്ച് ഭക്ഷണ അവശിഷ്ടങ്ങൾ നീക്കം ചെയ്യാം. പഴക്കം ചെന്ന ഭക്ഷണാവശിഷ്ടങ്ങൾ പറ്റിപ്പിടിച്ചിരിക്കുന്നുണ്ടെങ്കിൽ അതിലേക്ക് അൽപം ബേക്കിംഗ് സോഡയും നാരങ്ങാ നീരോ അല്ലെങ്കിൽ ലിക്വിഡ് ഡിഷ് വാഷോ ഒഴിച്ച് അല്പനേരം വയ്ക്കുക. ശേഷം ഒരു ബ്രഷ് ഉപയോഗിച്ച് മൃദുവായി ഉരയ്ക്കുക. തുടർന്ന് നനവുള്ള തുണി ഉപയോഗിച്ച് ഉപരിതലം തുടക്കാം.