രജനികാന്തിനെ നായകനാക്കി ലോകേഷ് കനകരാജ് സംവിധാനം ചെയ്യുന്ന ചിത്രമാണ് തലൈവർ 171. സിനിമയുടെ പ്രഖ്യാപനം മുതൽ ആരാധകർ വളരെ ആവേശത്തിലാണ്. സിനിമയുടെ തിരക്കഥയുമായി ബന്ധപ്പെട്ട ജോലികൾക്കായി ലോകേഷ് അടുത്തിടെ സമൂഹമാദ്ധ്യമങ്ങളിൽ നിന്നടക്കം അവധിയെടുത്തിരുന്നു. എന്നാൽ ചിത്രത്തെ കുറിച്ചുള്ള മറ്റ് വിവരങ്ങളൊന്നും പുറത്തുവന്നിരുന്നില്ല. ഇപ്പോഴിതാ ആരാധകരെ ആവേശത്തിലാക്കി ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്തുവിട്ടിരിക്കുകയാണ് അണിയറപ്രവർത്തകർ.
The much awaited #Thalaivar171 update is here!
Title revealing teaser from April 22nd 💥 @rajinikanth @Dir_Lokesh @anirudhofficial @anbariv pic.twitter.com/vpquKyetp8— Sun Pictures (@sunpictures) March 28, 2024
സ്വർണ നിറത്തിലുള്ള ഫ്രെയിമുകളുള്ള കൂളിംഗ് ഗ്ലാസ് ധരിച്ച വിന്റേജ് ലുക്കിലുള്ള രജനികാന്തിന്റെ ചിത്രമാണ് പോസ്റ്ററിലുള്ളത്. ചുരുട്ടിപ്പിടിച്ച രണ്ട് കൈകളും വിലങ്ങെന്നപോലെ സ്വർണവാച്ചുകൾ കൊണ്ട് ബന്ധിച്ചിരിക്കുന്നതായും കാണാം. ഒപ്പം ഒരു സർപ്രൈസ് പ്രഖ്യാപനവും നടത്തിയിരിക്കുകയാണ് നിർമാതാക്കളായ സൺ പിക്ചേഴ്സ്.
ടൈറ്റിൽ ടീസർ ഏപ്രിൽ 22 എത്തും എന്ന കുറിപ്പോടെയാണ് സൺപിക്ചേഴ്സ് പോസ്റ്റർ പങ്കുവച്ചിരിക്കുന്നത്. ചിത്രത്തിന്റെ ടൈറ്റിൽ പ്രഖ്യാപനം ഏപ്രിൽ 22ന് നടക്കുമെന്ന് സംവിധായകൻ ലോകേഷ് കനകരാജും സോഷ്യൽ മീഡിയയിലൂടെ അറിയിച്ചു. അനിരുദ്ധ് രവിചന്ദർ സംഗീത സംവിധാനവും അൻബറിവ് സംഘട്ടനസംവിധാനവും നിർവഹിക്കുന്നു. ചിത്രത്തേക്കുറിച്ചുള്ള മറ്റുവിവരങ്ങൾ പുറത്തുവിട്ടിട്ടില്ല.
