ബെംഗളൂരു: കർണാടകയിലെ വിജയപുര ജില്ലയിൽ കുഴൽക്കിണറിൽ വീണ ഒന്നര വയസുകാരനെ രക്ഷിച്ചു. 20 മണിക്കൂർ നീണ്ട രക്ഷാപ്രവർത്തനത്തിന് ഒടുവിലാണ് കുഞ്ഞിനെ രക്ഷപ്പെടുത്തിയത്. എൻഡിആർഎഫും എസ്ഡിആർഎഫും ചേർന്നായിരുന്നു രക്ഷാപ്രവർത്തനം. വിജയപുരയിലെ ഇൻഡി താലൂക്കിലുള്ള ലച്യാൻ ഗ്രാമത്തിലാണ് സംഭവമുണ്ടായത്.
കഴിഞ്ഞ ദിവസം വീടിന് സമീപം കളിക്കാനിറങ്ങിയ കുഞ്ഞ്, തുറന്നുകിടന്ന കുഴൽകിണറിനുള്ളിലേക്ക് വീഴുകയായിരുന്നു. കുഞ്ഞിന്റെ കരച്ചിൽ കേട്ടതോടെയാണ് അപകടം സംഭവിച്ച വിവരം വീട്ടുകാർ അറിഞ്ഞത്. ഉടൻ തന്നെ പോലീസിൽ അറിയിക്കുകയും ബുധനാഴ്ച വൈകിട്ട് 6.30ഓടെ രക്ഷാദൗത്യം ആരംഭിക്കുകയും ചെയ്തു.
16 അടി താഴ്ചയുള്ള കിണറിലേക്കാണ് കുഞ്ഞുവീണത്. സമാന്തരമായി മറ്റൊരു കിണർ കുഴിച്ച് ദൗത്യസംഘം രക്ഷാപ്രവർത്തനം തുടങ്ങി. 21 അടി താഴ്ചയിൽ കുഴി തുരന്ന് കുഞ്ഞിനെ കണ്ടെത്തുകയും പുറത്തെടുക്കുകയുമായിരുന്നു. സംഭവസ്ഥലത്ത് ക്യാമ്പ് ചെയ്തിരുന്ന മെഡിക്കൽ സംഘം അടിയന്തര വൈദ്യസഹായം കുഞ്ഞിന് ഉറപ്പുവരുത്തി. ശേഷം ആശുപത്രിയിലേക്ക് മാറ്റി. കുഞ്ഞിന്റെ ആരോഗ്യനില മെച്ചപ്പെട്ട് വരികയാണെന്നാണ് വിവരം.
