നടൻ മാളയെ അനുസ്മരിക്കാൻ സിനിമാ മേഖലയിലെ ആരും തയ്യാറാകുന്നില്ലെന്ന് മാള അരവിന്ദൻ ഫൗണ്ടേഷൻ. ഇത് സംബന്ധിച്ച് അഭിനേതാക്കളുടെ സംഘടനാ ഭാരവാഹികൾക്ക് മാള അരവിന്ദൻ ഫൗണ്ടേഷൻ കത്തും നൽകി. മോഹൻലാൽ, ഇടവേള ബാബു എന്നിവർക്കാണ് ഫൗണ്ടേഷൻ ജനറൽ സെക്രട്ടറി ഷാന്റി ജോസഫ് തട്ടകത്ത് കത്ത് നൽകിയത്.
മാള അരവിന്ദിന്റെ ചരമ വാർഷികത്തോട് അനുബന്ധിച്ചുള്ള അനുസ്മരണ ചടങ്ങിൽ പങ്കെടുക്കാൻ കഴിഞ്ഞ എട്ട് വർഷമായി സിനിമാ രംഗത്തുള്ളവർ താത്പര്യം കാണിക്കുന്നില്ലെന്ന് കത്തിൽ ആരോപിക്കുന്നു. ഫെബ്രുവരിയിൽ നടത്താറുള്ള അനുസ്മരണച്ചടങ്ങ് ഈ വർഷം നടത്താൻ കഴിഞ്ഞില്ലെന്നും കത്തിൽ പറയുന്നുണ്ട്.
അറുന്നൂറോളം മലയാള സിനിമകളിൽ അഭിനയിച്ചിട്ടുള്ള മാള അരവിന്ദന്റെ അനുസ്മരണച്ചടങ്ങിലേക്ക് ക്ഷണിക്കുമ്പോൾ പലരും ഒഴിഞ്ഞുമാറുന്ന അവസ്ഥയുമാണുള്ളത്. പിന്നാക്ക വിഭാഗക്കാരനായതിനാലാണ് സർക്കാർ സ്മാരകം പോലും നിർമ്മിക്കാതെ അവഗണന കാട്ടുന്നതെന്നും കത്തിൽ വ്യക്തമാക്കുന്നുണ്ട്. ഇക്കാര്യത്തിൽ അമ്മ എന്ന സംഘടനയും ഇടപെട്ടില്ലെന്നാണ് കത്തിലെ ആരോപണം.
