മലയാളികൾക്ക് ഏറെ സുപരിചിതയായ നടിയാണ് താര കല്യാൺ. നർത്തകിയായും സിനിമ, സീരിയൽ രംഗത്തും സുപരിചിതയായ താര കല്യാൺ സോഷ്യൽ മീഡിയയിലും സജീവമാണ്. തന്റെ വീട്ടുവിശേഷങ്ങളും നൃത്ത വിദ്യാലയത്തിന്റെ വിശേഷങ്ങളും താരം സോഷ്യൽ മീഡിയയിൽ പങ്കുവക്കാറുണ്ട്. അടുത്തിടെ നടത്തിയ ശബ്ദ ശസ്ത്രക്രിയയ്ക്ക് ശേഷം അഭിനയ രംഗത്ത് ചെറിയ ഇടവേള എടുത്തിരിക്കുകയാണ് താരം.
ഇപ്പോഴിതാ സമൂഹമാദ്ധ്യമങ്ങളിലൂടെ തന്റെ അവസ്ഥ ആരാധകരുമായി പങ്കുവച്ചിരിക്കുകയാണ് താരം. ശസ്ത്രക്രിയ കഴിഞ്ഞ് രണ്ട് ആഴ്ച കഴിഞ്ഞു. എന്നാൽ ശസ്ത്രക്രിയ കഴിഞ്ഞ് രണ്ടാഴ്ച കഴിഞ്ഞിട്ടും ശബ്ദം തീരെ ഇല്ല. എഐ വഴിയാണ് വീഡിയോ എടുക്കുന്നത്. എത്രയും വേഗം ശബ്ദം വീണ്ടെടുക്കണം. സ്വന്തം ശബ്ദത്തിൽ വീഡിയോ എടുക്കണമെന്നതാണ് ഇപ്പോഴത്തെ ആഗ്രഹമെന്നും താര കല്യാൺ പറയുന്നു.
നടിയുടെ അവസ്ഥയെ പറ്റി ഡോക്ടർ പറയുന്നതും വീഡിയോയിൽ ഉൾപ്പെടുത്തിയിട്ടുണ്ട്. ശബ്ദം തിരികെ കിട്ടാൻ നാല് മുതൽ ആറ് ആഴ്ച വരെ സമയമെടുക്കും. ഇപ്പോഴത്തെ അവസ്ഥ കണ്ട് പേടിക്കേണ്ടതില്ലെന്നും ശബ്ദം തിരികെ കിട്ടുമെന്നും ഡോക്ടർമാർ അറിയിച്ചു. താര കല്യാണിന് സ്പാസ്മോഡിക് ഡിസ്ഫോണിയ എന്ന രോഗമാണ് ബാധിച്ചിരിക്കുന്നത്. പേര് പോലെ ഭീകരനല്ല ഈ രോഗം. എന്നാൽ ആളുകൾക്ക് ഈ രോഗം ഉണ്ടാകുന്നതിന്റെ കാരണം വ്യക്തമല്ലെന്നും ഡോക്ടർ പറഞ്ഞു.
നടി പങ്കുവച്ച വീഡിയോയ്ക്ക് പിന്നാലെ നിരവധി പേരാണ് കമന്റുകളുമായി എത്തിയത്. വേഗം സുഖം പ്രാപിക്കട്ടെയെന്ന് ആശംസിച്ചുകൊണ്ടുളള കമന്റുകളാണ് അധികവും.