ആരോഗ്യമാണ് മറ്റെല്ലാത്തിനെക്കാളും വലുതെന്ന് ജയ്ഗണേഷ് സിനിമ ചെയ്തപ്പോൾ തനിക്ക് മനസിലായെന്ന് നടൻ ഉണ്ണിമുകുന്ദൻ. ആദ്യത്തെ മൂന്ന് നാല് ദിവസം വീൽ ചെയറിൽ ഇരുന്ന് അഭിനയിക്കാനും തനിക്ക് ഭയങ്കര ബുദ്ധിമുട്ടായിരുന്നെന്നും ഉണ്ണിമുകുന്ദൻ പറഞ്ഞു. മാനസികമായി വളരെ അധികം അടുത്തൊരു ചിത്രം കൂടിയാണ് ജയ്ഗണേഷെന്നും താരം വ്യക്തമാക്കി. ഒരു അഭിമുഖത്തിനിടയിലായിരുന്നു ഉണ്ണിമുകുന്ദൻ ഇക്കാര്യങ്ങൾ പറഞ്ഞത്.
‘വീൽ ചെയറിൽ ഇരുന്ന് 60 ദിവസത്തോളം ഷൂട്ട് ചെയ്തപ്പോൾ എന്റെ വണ്ണം കൂടി. ദിവ്യാംഗരായ ആളുകൾക്ക് ഒരുപരിധിയിൽ കൂടുതൽ ആഹാരം കഴിക്കാൻ പറ്റില്ലെന്ന് എനിക്ക് മനസിലായി. ഇവരെ കുറിച്ച് കൂടുതലായി മനസിലാക്കുന്നതിനായി എനിക്കൊരു സിനിമ ചെയ്യേണ്ടി വന്നു. ഇമോഷണലായി ഞാൻ ഒരുപാട് അടുത്ത കഥാപാത്രമാണ് ജയ് ഗണേഷിലേത്.
ആദ്യത്തെ മൂന്ന് നാല് ദിവസം എനിക്ക് ഭയങ്കര ബുദ്ധിമുട്ടായിരുന്നു. വീൽ ചെയറിൽ എങ്ങനെയാകും ജീവിക്കുന്നതെന്ന് ഞാൻ എക്സ്പീരിയൻസ് ചെയ്തു. ഈ സിനിമ ചെയ്ത് കഴിഞ്ഞപ്പോഴാണ് എന്റെ പ്രശ്നങ്ങളൊന്നും വലിയ പ്രശ്നങ്ങൾ അല്ലെന്ന് മനസിലായത്. പിന്നെ, ജോലി ആയില്ല, സാമ്പത്തിക പ്രശ്നം ഉള്ളവർ, ഇങ്ങനെയൊക്കെയുള്ള പ്രശ്നങ്ങൾ പറയുന്നവർക്ക് നല്ല ആരോഗ്യം ഉണ്ടെങ്കിൽ എല്ലാം നേടാൻ സാധിക്കും. ആരോഗ്യമാണ് എല്ലാത്തിനെക്കാളും വലുതെന്ന് എനിക്ക് മനസിലായി.’- ഉണ്ണിമുകുന്ദൻ പറഞ്ഞു.
