ചെന്നൈ : കച്ചത്തീവിൽ ആരാണ് താമസിക്കുന്നതെന്ന കോൺഗ്രസ് നേതാവ് ദിഗ് വിജയ് സിംഗിന്റെ പരാമർശത്തിനെതിരെ രൂക്ഷ വിമർശനവുമായി തമിഴ്നാട് ബിജെപി അദ്ധ്യക്ഷൻ കെ അണ്ണാമലൈ. രാജ്യത്തിന്റെ അഖണ്ഡതയിൽ വിട്ടുവീഴ്ച ചെയ്തതിൽ കോൺഗ്രസിന് ഇപ്പോഴും കുറ്റബോധമില്ലെന്ന് അണ്ണാമലൈ വിമർശിച്ചു. സമൂഹമാദ്ധ്യമത്തിലൂടെയാണ് അദ്ദേഹം കോൺഗ്രസിനെതിരായ വിമർശനം ഉന്നയിച്ചത്.
” രാജ്യത്തിന്റെ അഖണ്ഡതയിൽ വിട്ടുവീഴ്ച ചെയ്തതിനും, നമ്മുടെ മത്സ്യത്തൊഴിലാളികളുടെ ജീവൻ അപകടത്തിലാക്കിയതിനും കോൺഗ്രസ് നേതാക്കൾ ഇപ്പോഴും ഒരു കുറ്റബോധവും കാണിക്കുന്നില്ല. ഒരു പുല്ല് പോലും മുളയ്ക്കാത്ത സ്ഥലമെന്നാണ് അക്സായി ചിന്നിന്റെ കാര്യത്തിൽ കോൺഗ്രസുകാർ പറഞ്ഞത്. ഇപ്പോൾ കച്ചത്തീവിന്റെ കാര്യം വരുമ്പോൾ അവിടെ ആരാണ് താമസിക്കുന്നത് എന്നാണ് അവർ ചോദിക്കുന്നത്. കോൺഗ്രസിന്റെ ചിന്താഗതിയെ ആണ് ഇത്തരം പ്രസ്താവനകൾ പ്രതിഫലിപ്പിക്കുന്നത്”. അണ്ണാമലൈ കുറിച്ചു.
കച്ചത്തീവ് വിഷയത്തിൽ നടത്തിയ പരാമർശത്തിൽ ദിഗ് വിജയ് സിംഗ് മാപ്പ് പറയണമെന്നും അണ്ണാമലൈ ആവശ്യപ്പെട്ടു. ഇത്തരം വിവേകശൂന്യമായ പ്രസ്താവനകൾ നടത്തിയതിനും, മത്സ്യത്തൊഴിലാളി സമൂഹത്തിന് എന്നും കരുത്ത് പകരുന്ന പ്രധാനമന്ത്രി നരേന്ദ്രമോദിയെ കുറിച്ച് അപകീർത്തികരമായ പരാമർശം നടത്തിയതിനും കോൺഗ്രസും നിരുപാധികം മാപ്പ് പറയണമെന്നും” അണ്ണാമലൈ പറഞ്ഞു.