പ്രമുഖ മൾട്ടിപ്ലെക്സ് ശൃംഖലയായ പിവിആറിനെതിരെ സംവിധായകനും നടനുമായ വിനീത് ശ്രീനിവാസൻ. ഫെഫ്‌കയുടെ നേതൃത്വത്തിൽ നടത്തിയ വാർത്താസമ്മേളനത്തിലാണ് പിവിആറിനെ വിനീത് രൂക്ഷമായ ഭാഷയിൽ വിമർശിച്ചത്.
റിലീസിന്റെ തലേദിവസമാണ് പിവിആർ സ്ക്രീനിലൊന്നും സിനിമ പ്രദർശിപ്പിക്കില്ലെന്ന് അറിയുന്നത്. രാജ്യത്തെ പല മൾട്ടിപ്ലെക്‌സുകളും അവരുടെ കൈയിലാണ്. ഈ തിയറ്ററുകളിലൊന്നും ഇപ്പോൾ മലയാള സിനിമയില്ല, വിനീത് പറഞ്ഞു.
പ്രതിസന്ധി കാലത്ത് പിവിആർ അടക്കമുള്ള തിയറ്ററുകളുടെ കൂടെ നിന്നവരാണ് താനും നിർമാതാവ് വിശാഖ് സുബ്രഹ്മണ്യവും. ഹൃദയം എന്ന ചിത്രത്തിന് മൂന്നിരിട്ടി ഓഫർ ലഭിച്ചിട്ടും ഒടിടിയിൽ കൊടുത്തില്ല.
ഹൃദയം ചെയ്യുന്ന സമയത്ത് സൺഡേ ലോക്ക് ഡൗൺ ആയിരുന്നു. അന്ന് നിരവധി തിയറ്ററുകാരാണ് സിനിമ ഒടിടിയിൽ റിലീസ് ചെയ്യരുത് ആവശ്യപ്പെട്ട് വിളിച്ചത്. അവരാണ് ഇങ്ങനെ ചെയ്യുന്നത്. ഞാൻ ഇത്രയും സംസാരിക്കാത്ത ആളാണ്, വളരെ വിഷമത്തോടു കൂടിയാണ് നിങ്ങളുടെ മുന്നിൽ നിൽക്കുന്നത്, വിനീത് കൂട്ടിച്ചേർത്തു.
