ഓരോ ദിവസം കഴിയുന്തോറും ചൂടിന്റെ കാഠിന്യം അസഹനീയമായി വരികയാണ്. പുറത്തേക്കൊന്ന് ഇറങ്ങിയാൽ പൊള്ളിപോകുന്ന വിധത്തിലായിരിക്കുന്നു ഇപ്പോഴത്തെ താപനില. ചൂട് കൂടുന്നതിനനുസരിച്ച് നാം എല്ലാവരും നേരിടുന്ന മറ്റൊരു പ്രശ്‌നവും ഇതിനൊപ്പമുണ്ട്. വിയർപ്പ്! പുറത്തേക്കിറങ്ങിയാൽ ”നിന്നെ ഞാൻ ഇപ്പോൾ വിയർത്തു കുളിപ്പിക്കുമെടൊ” എന്ന ഭാവത്തിലാണ് സൂര്യൻ തലയ്‌ക്ക് മുകളിൽ കത്തിജ്വലിച്ചു നിൽക്കുന്നത്. ഇങ്ങനെ വിയർത്തൊലിച്ചും വിയർപ്പ് മൂലമുള്ള ദുർഗന്ധം കാരണവും പൊതുയിടങ്ങളിലേക്ക് ഇറങ്ങാൻ ഇന്ന് മിക്ക ആളുകൾക്കും മടിയാണ്. എന്നാൽ ഇനി ആ മടി വേണ്ട. വിയർപ്പും, വിയർപ്പ് മൂലമുള്ള ദുർഗന്ധവും അകറ്റി നിർത്താൻ ചില നുറുങ്ങുവിദ്യകൾ പരീക്ഷിക്കാം..
കോട്ടൺ വസ്ത്രങ്ങൾ ധരിക്കാം..
ചൂടുകാലത്ത് പൊതുവെ കറുത്ത വസ്ത്രങ്ങളോട് ‘നോ’ പറയുന്നതാണ് നല്ലത്. അയഞ്ഞതും കനം കുറഞ്ഞതുമായ കോട്ടൺ വസ്ത്രങ്ങൾ പരമാവധി ധരിക്കാൻ ശ്രദ്ധിക്കുക. ഇത് വിയർപ്പ് നിയന്ത്രിക്കാനും വിയർപ്പിനെ വലിച്ചെടുക്കാനും സഹായിക്കുന്നു.
ചൂട് വെള്ളത്തിൽ കുളിക്കുന്നത് ഒഴിവാക്കുക
എത്ര ചൂടാണെങ്കിലും ചൂട് വെള്ളത്തിൽ കുളിച്ചില്ലെങ്കിൽ ഒരു ഊർജ്ജം കിട്ടില്ലെന്ന് പറയുന്ന ആളുകളാണ് നമ്മിൽ പലരും. എന്നാൽ ചൂടുകാലത്ത് ഈ ശീലം മാറ്റി നിർത്താം. തണുത്ത വെള്ളത്തിൽ കുളിക്കാൻ പരമാവധി ശ്രദ്ധിക്കുക. ഇങ്ങനെ രാവിലെയും വൈകിട്ടും കുളിക്കുന്നത് ശരീരത്തിലെ താപനിലയെ നിയന്ത്രിച്ച് നിർത്തി വിയർപ്പ് കുറയ്‌ക്കാൻ സഹായിക്കുന്നു.
പഴവർഗങ്ങൾ കഴിക്കുക
വേനൽക്കാലത്ത് ഭക്ഷണ കാര്യങ്ങളിലും ഒരുപാട് ശ്രദ്ധിക്കാനുണ്ട്. വറുത്തതും പൊരിച്ചതുമായ ഭക്ഷണങ്ങൾ കഴിക്കുന്നത് ചൂട് വർദ്ധിപ്പിക്കുന്നതിനും വിയർത്തൊലിക്കുന്നതിനും കാരണമാകുന്നു. അതിനാൽ വേനൽകാലത്ത് പഴവർഗങ്ങളായ തണ്ണിമത്തൻ, ആപ്പിൾ, മുന്തിരി തുടങ്ങിയവ ഭക്ഷണത്തിൽ ഉൾപ്പെടുത്തി കഴിക്കാൻ ശ്രദ്ധിക്കുക.
വെള്ളം ധാരാളം കുടിക്കാം
നിർജ്ജലീകരണം മൂലവും ശരീരത്തിലെ താപനില വർദ്ധിക്കാൻ കാരണമായേക്കാം. അതിനാൽ പുറത്തേക്കിറങ്ങുമ്പോഴും വെള്ളം കയ്യിൽ കരുതാൻ ശ്രദ്ധിക്കണം. ഇതിനു പുറമെ ഐസ് വെള്ളം കയ്യിൽ കരുതി ശരീരത്തിൽ സ്‌പ്രേ ചെയ്ത് കൊടുക്കുന്നത് വിയർപ്പ് കുറയ്‌ക്കുന്നതിനും ഇത് മൂലമുള്ള ദുർഗന്ധം കുറയ്‌ക്കുന്നതിനും സഹായിക്കുന്നു.
NOTE: ചില വ്യക്തികളിൽ വിയർപ്പിന്റെ അസുഖമുണ്ടായേക്കാം. ഇത്തരക്കാരിൽ ചൂടെന്നോ തണുപ്പെന്നോ ഋതുഭേദങ്ങളില്ലാതെ വിയർപ്പ് അനുഭവപ്പെടാറുണ്ട്. ഇങ്ങനെയുള്ളവർ വൈദ്യസഹായം തേടാൻ ശ്രമിക്കുക.
