മലയാളികൾക്ക് ഏറെ പ്രിയപ്പെട്ട യൂട്യൂബ് ഇൻഫ്ലുവൻസറാണ് ഗ്ലാമി ഗംഗ. വൺ മില്യൺ സ്ക്രൈബേഴ്സ് ഗ്ലാമിയുടെ ചാനലിനുണ്ട്. നിരവധി ബ്യൂട്ടി ടിപ്പുകളാണ് തന്റെ യൂട്യൂബ് ചാനലിലൂടെ ഗ്ലാമി പങ്കുവെക്കറുള്ളത്. ഒപ്പം തന്റെ വീട്ടുവിശേഷങ്ങളും പ്രേക്ഷകരുമായി പങ്കുവക്കാറുണ്ട്. ഗംഗയെ ബാധിച്ച രോഗാവസ്ഥയെക്കുറിച്ചാണ് താരം ഇപ്പോൾ തുറന്നുപറഞ്ഞിരിക്കുന്നത്.
‘ പെട്ടെന്ന് മുഖത്ത് കുറേ മുഖക്കുരുകൾ വന്നു. ആദ്യം മേക്കപ്പ് പ്രൊഡക്ടുകൾ ഉപയോഗിക്കാതെ ശ്രദ്ധിച്ചു. എന്നിട്ടും കുറയാതെ വന്നപ്പോൾ ഡെർമറ്റോളജിസ്റ്റിനെ കണ്ടു. പല മേക്കപ്പ് വസ്തുക്കളും മാറി മാറി ഉപയോഗിക്കുന്നത് കൊണ്ടാകാമെന്ന് അവർ പറഞ്ഞു. അതോടെ മേക്കപ്പ് വസ്തുക്കൾ നന്നായി കുറച്ചു. എന്നിട്ടും മുഖക്കുരുവിന്റെ കാര്യത്തിൽ ഒരു കുറവും ഉണ്ടായില്ല. ആദ്യം കവിളിൽ മാത്രം ഉണ്ടായിരുന്ന കുരു പിന്നീട് മുഖത്താകെ വരാൻ തുടങ്ങി.
കുറച്ച് ദിവസം കഴിഞ്ഞപ്പോൾ വല്ലാത്ത വയറുവേദനയും അസ്വസ്ഥതയും തുടങ്ങി. ഭക്ഷണം കഴിക്കാൻ പറ്റാത്ത അവസ്ഥ. വെള്ളം കുടിച്ചാൽ പോലും വയർ വീർക്കും. ഭയങ്കരമായ ക്ഷീണവും അനുഭവപ്പെടാൻ തുടങ്ങി. എന്ത് കഴിച്ചാലും ടോയ്ലറ്റിൽ പോകുന്ന അവസ്ഥ. ശാരീരികമായി വല്ലാതെ ക്ഷീണിച്ചു. ഇതിനിടെ ഒരു ദിവസം ടോയ്ലറ്റിൽ പോയപ്പോൾ രക്തം കണ്ടു. അതോടെ പേടിയും കൂടി.
ക്യാൻസർ ആണെന്നാണ് ഞാൻ സ്വയം ഉറപ്പിച്ചു. എന്റെ അവസ്ഥ കണ്ട് ഒരു സുഹൃത്ത് കാര്യം തിരക്കി. എല്ലാം കേട്ട് കഴിഞ്ഞ് അവൻ എന്നെ കളിയാക്കി. പോയി ഒരു ഗാസ്ട്രോ എൻട്രോളജിസ്റ്റിനെ കാണാൻ പറഞ്ഞു. ആദ്യം മടിച്ചെങ്കിലും ഒടുവിൽ ഡോക്ടറെ കാണാൻ തീരുമാനിച്ചു. അപ്പോഴാണ് എനിക്ക് എന്താണ് പ്രശ്നമെന്ന് മനസിലായത്.
ഇറിറ്റബിൾ ബവൽ സിൻഡ്രോം (ഐബിഎസ്) എന്ന രോഗാവസ്ഥയായിരുന്നു എനിക്ക്. പഴങ്ങൾ, പച്ചക്കറികൾ, പ്രോ ബയോട്ടിക് ആയിട്ടുള്ള ആഹാര വസ്തുക്കൾ എന്നിവ ഡയറ്റിൽ ഉൾപ്പെടുത്തിയാൽ ഇത് ശരിയാകുമായിരുന്നു. ഇപ്പോൾ ഡയറ്റ് കൺട്രോൾ ചെയ്താണ് മുന്നോട്ട് പോകുന്നതെന്നും ഗ്ലാമി ഗംഗ പറഞ്ഞു.