മനോഹരം എന്ന ചിത്രത്തിലൂടെ മലയാളികൾക്ക് സുപരിചിതയായ നായികയാണ് അപർണ ദാസ്. നടിയുടെ വിവാഹ ആഘോഷങ്ങളാണ് ഇപ്പോൾ സമൂഹമാദ്ധ്യമങ്ങളിൽ ശ്രദ്ധേയമാകുന്നത്.
ബന്ധുക്കൾക്കും സുഹൃത്തുക്കൾക്കും ഒപ്പം ഹൽദി ആഘോഷിക്കുന്ന അപർണയുടെ ചിത്രങ്ങളും വീഡിയോകളും പുറത്തുവന്നു. അപർണയുടെ സോഷ്യൽ മീഡിയ പേജുകളിലും ഹൽദി ആഘോഷത്തിന്റെ ചിത്രങ്ങൾ പങ്കുവച്ചിട്ടുണ്ട്.
വിനീത് ശ്രീനിവാസൻ സംവിധാനം ചെയ്ത തട്ടത്തിൻ മറയത്ത് എന്ന ചിത്രത്തിലൂടെ മലയാളികൾക്ക് സുപരിചിതനായ നടൻ ദീപക് പറമ്പോലാണ് അപർണയുടെ വരൻ.
ഏറെ നാളത്തെ പ്രണയത്തിനൊടുവിലാണ് ഇരുവരും വിവാഹിതരാകുന്നത്. നാളെ തൃശൂർ വടക്കാഞ്ചേരിയിൽ വച്ചാണ് ഇരുവരുടെയും വിവാഹം നടക്കുന്നത്.
പരമ്പരാഗത വസ്ത്രങ്ങൾ ധരിച്ച് അതീവ സുന്ദരിയായ അപർണയെ ഹൽദി ആഘോഷങ്ങളിൽ കാണാം. കഴുത്തിൽ പൂമാല അണിഞ്ഞ് ബന്ധുക്കൾക്ക് ഒപ്പം നൃത്തം ചെയ്യുന്നതിന്റെ വീഡിയോകളും പുറത്തുവന്നിട്ടുണ്ട്.
ഒപ്പം ബന്ധുക്കൾ മുഖത്ത് മഞ്ഞൾ തേക്കുന്നതിന്റെയും മഞ്ഞൾ വെള്ളം ഒഴിക്കുന്നതിന്റെ ചിത്രങ്ങളും ഇക്കൂട്ടത്തിൽ ഉണ്ട്.
ഞാൻ പ്രകാശൻ എന്ന ചിത്രത്തിലൂടെയാണ് അപർണ അഭിനയ രംഗത്തെത്തിയത്. എന്നാൽ മനോഹരമാണ് അപർണയുടെ ശ്രദ്ധ നേടിയ ചിത്രം. ചെറിയൊരു ഇടവേളയ്ക്ക് ശേഷം തമിഴിൽ വിജയ്ക്കൊപ്പം അഭിനയിച്ച ബീസ്റ്റ്, ദാദ എന്നീ ചിത്രങ്ങളും പ്രേക്ഷക ശ്രദ്ധ നേടിയിരുന്നു.
നടനായും പ്രതിനായകനായും സഹതാരമായുമെല്ലാം തിളങ്ങിയ നടനാണ് ദീപക്. മലയാളത്തിലെ വമ്പൻ ഹിറ്റായ ചിത്രം മഞ്ഞുമ്മൽ ബോയ്സിലും താരം ശ്രദ്ധേയമായ വേഷം കൈകാര്യം ചെയ്തിട്ടുണ്ട്.
