7G റെയിൻബോ കോളനി, പുതുപ്പേട്ടൈ തുടങ്ങിയ ഹിറ്റ് ചിത്രങ്ങളിലൂടെ പ്രേക്ഷകരുടെ മനം കവർന്ന സോണിയ അഗർവാൾ നായികയാകുന്ന മലയാള ചിത്രത്തിന്റെ ടീസറെത്തി. ഹൊറർ ത്രില്ലർ ചിത്രം ‘ബിഹൈൻഡിന്റെ ടീസറാണ് അണിയറപ്രവർത്തകർ പുറത്തുവിട്ടത്. അമൽ റാഫിയുടെ സംവിധാനത്തിൽ പാവക്കുട്ടി ക്രിയേഷൻസിന്റെ ബാനറിൽ ഷിജ ജിനുവാണ് ചിത്രം നിർമ്മിക്കുന്നത്. മഞ്ജുവാര്യരും രമ്യ കൃഷ്ണനും ചേർന്നാണ് സമൂഹമാദ്ധ്യമങ്ങളിലൂടെയാണ് തമിഴിലും മലയാളത്തിലുമായി റിലീസിന് എത്തുന്ന സിനിമയുടെ ടീസർ പുറത്തുവിട്ടത്. മലയാളത്തിനും തമിഴിനും പുറമെ തെലുങ്കിലും ചിത്രം റിലീസിനെത്തുണ്ട്.
ദുരൂഹത നിറഞ്ഞ ഒരു ബംഗ്ലാവിലെ ഒളിഞ്ഞിരിക്കുന്ന നിഗൂഢതകൾ പുറത്തു കൊണ്ടുവരുന്ന ഹൊറർ സിനിമയാണ് ബിഹൈൻഡ്. സോണിയ അഗർവാളിന് പുറമെ ജിനു ഇ തോമസും പ്രധാന വേഷത്തിലെത്തുന്നു. മെറീന മൈക്കിൾ, നോബി മാർക്കോസ്, സിനോജ് വർഗീസ്, അമൻ റാഫി, ഗായത്രി മയൂര, വി കെ ബൈജു, കണ്ണൻ സാഗർ, ജെൻസൺ ആലപ്പാട്ട്, ശിവദാസൻ മാറമ്പിള്ളി, അമ്പിളി സുനിൽ തുടങ്ങിയവരും ചിത്രത്തിലുണ്ട്. ചിത്രത്തിന്റെ മ്യൂസിക് പാർട്ണർ സരിഗമയാണ്.
സന്ദീപ് ശങ്കർ, ടിഷമീർ മുഹമ്മദ് എന്നിവരാണ് ചിത്രത്തിന്റെ ഛായാഗ്രഹണം നിർവഹിക്കുന്നത്. വൈശാഖ് രാജനാണ് എഡിറ്റർ. മുരളി അപ്പാടത്തും, സണ്ണി മാധവനും, ആരിഫ് ആൻസാറും ചേർന്ന് സംഗീത സംവിധാനം നിർവഹിച്ചിരിക്കുന്നു. ചിത്രത്തിന്റെ ചീഫ് അസോസിയേറ്റ് വൈശാഖ് എം സുകുമാരനാണ്. പിആർഒ ശിവപ്രസാദ് പി, എ എസ് ദിനേശ് എന്നിവരും പ്രൊഡക്ഷൻ കൺട്രോളർ ഷൗക്കത്തുമാണ്.