ഉണ്ണി മുകുന്ദൻ നായകനാകുന്ന ഏറ്റവും പുതിയ ചിത്രമാണ് മാർകോ. ഹനീഫ് അദേനിയുടെ സംവിധാനത്തിലൊരുങ്ങുന്ന ചിത്രം കഴിഞ്ഞ ഫെബ്രുവരിയിലാണ് പ്രഖ്യാപിച്ചത്. ചിത്രത്തിന്റെ പൂജ മെയ് മൂന്നിനാകുമെന്ന വിവരമാണ് ഇപ്പോൾ പുറത്തുവരുന്നത്. ഉണ്ണി മുകുന്ദനാണ് ഇക്കാര്യം ഫെയ്സ്ബുക്കിലൂടെ പങ്കുവച്ചത്.
മലയാളത്തിൽ നിന്നുള്ള ഏറ്റവും മികച്ച ആക്ഷൻ ത്രില്ലർ സിനിമകളിലൊന്നാകും മാർകോ എന്നാണ് പുറത്തു വരുന്ന റിപ്പോർട്ടുകൾ. ഷരീഫ് മുഹമ്മദും അബ്ദുൾ ഗദാഫും ചേർന്നാണ് ചിത്രത്തിന്റെ നിർമാണം. ക്യൂബ്സ് എന്റർടെയ്ൻമെന്റ്സും ഉണ്ണി മുകുന്ദൻ ഫിലിംസും ചേർന്നാണ് മാർക്കോ തിയേറ്ററിലെത്തിക്കുന്നത്. മലയാളം, തമിഴ്, തെലുങ്ക്, കന്നഡ, ഹിന്ദി എന്നിങ്ങനെ അഞ്ച് ഭാഷകളിലാണ് ചിത്രം പുറത്തിറങ്ങുക.
ഉണ്ണി മുകുന്ദന്റെ ഏറ്റവും ശക്തമായ കഥാപാത്രങ്ങളിലൊന്നായിരുന്നു ഹനീഫ് അദേനി സംവിധാനം ചെയ്ത് 2019-ൽ പുറത്തിറങ്ങിയ മിഖായേൽ എന്ന ചിത്രത്തിലെ മാർകോ ജൂനിയർ. നിവിൻ പോളി നായകനായ ചിത്രത്തിൽ വില്ലനായിട്ടാണ് ഉണ്ണി മുകുന്ദൻ എത്തിയത്. നായകനേക്കാളേറെ ഉണ്ണി മുകുന്ദന്റെ വില്ലൻ വേഷമായിരുന്നു ആരാധകർ ഏറ്റെടുത്തത്.