ന്യൂഡൽഹി: വയനാട്ടിൽ ലോക്സഭാ സീറ്റിന് പുറമെ റായ്ബറേലിയിലും മത്സരിക്കാനുള്ള തീരുമാനത്തിന് പിന്നാലെ കോൺഗ്രസ് നേതാവ് രാഹുൽ ഗാന്ധിയെ പരിഹസിച്ച് ലോക ചെസ് ചാമ്പ്യൻ ഗാരി കാസ്പറോവ്. മുൻനിരയെ വെല്ലുവിളിക്കുന്നതിന് മുൻപായി ആദ്യം റായ്ബറേലിയിൽ നിന്ന് വിജയിച്ച് കാണിക്കാനാണ് ഗാരി കാസ്പറോവ് പറഞ്ഞത്. രാഹുലിനെ പരിഹസിച്ച് ഒരു ഉപയോക്താവ് പോസ്റ്റ് ചെയ്ത കുറിപ്പിന് മറുപടിയായിട്ടാണ് കാസ്പറോവിന്റെ പ്രതികരണം.
ലോക്സഭാ തെരഞ്ഞെടുപ്പ് പ്രചാരണത്തിനിടെ രാഹുൽ ഗാന്ധി ചെസ് കളിക്കുന്ന ഒരു വീഡിയോ കോൺഗ്രസ് സമൂഹമാദ്ധ്യമത്തിൽ പങ്കുവച്ചിരുന്നു. ഗാരി കാസ്പറോവിനെയാണ് ഈ വീഡിയോയിൽ തന്റെ ഇഷ്ട ചെസ് കളിക്കാരനായി രാഹുൽ എടുത്ത് പറയുന്നത്. ചെസ് കളിയും രാഷ്ട്രീയവും താരതമ്യം ചെയ്തും രാഹുൽ സംസാരിക്കുന്നുണ്ട്. രാഷ്ട്രീയക്കാർക്കിടയിലെ ഏറ്റവും മികച്ച ചെസ് കളിക്കാരനെന്നാണ് രാഹുൽ ഇതിൽ സ്വയം വിശേഷിപ്പിക്കുന്നത്.
ഈ വീഡിയോ പങ്കുവച്ച് കൊണ്ടാണ് ഒരു ഉപയോക്താവ് രാഹുലിനെ പരിഹസിച്ചത്. ”കാസ്പറോവും വിശ്വനാഥൻ ആനന്ദുമെല്ലാം നേരത്തെ വിരമിച്ചത് കൊണ്ട് നമ്മുടെ കാലത്തെ ഏറ്റവും വലിയ ചെസ് പ്രതിഭയെ അവർക്ക് നേരിടേണ്ടി വന്നില്ല. അത് വലിയ ആശ്വാസമായി തോന്നുന്നു” എന്നായിരുന്നു പരിഹാസം. ഇൗ ട്വീറ്റിന് മറുപടിയായിട്ടാണ് കാസ്പറോവ് പ്രതികരിച്ചത്. വെല്ലുവിളികൾ നടത്തുന്നതിന് മുൻപായി റായ്ബറേലിയിൽ വിജയിച്ച് കാണിക്കൂ എന്നാണ് അദ്ദേഹം കുറിച്ചത്.
ഇന്നലെയാണ് രാഹുൽ റായ്ബറേലിയിൽ നിന്നും നാമനിർദേശ പത്രിക സമർപ്പിച്ചത്. വയനാട് ലോക്സഭാ സീറ്റിൽ നിന്നും രാഹുൽ മത്സരിക്കുന്നുണ്ട്. മുൻ ലോക ഒന്നാം നമ്പർ താരമായ ഗാസ്പറോവ് 1985ൽ തന്റെ 22ാം വയസിലാണ് ലോക ചാമ്പ്യനാകുന്നത്. വിശ്വനാഥൻ ആനന്ദിന്റെ സമകാലികൻ കൂടിയാണ് ഈ ഇതിഹാസ റഷ്യൻ താരം. അടുത്തിടെ ഇന്ത്യയുടെ ഡി ഗുകേഷ് കാസ്പറോവിന്റെ റെക്കോർഡ് തകർത്തപ്പോൾ അദ്ദേഹം ഗുകേഷിനെ അഭിനന്ദിച്ചും സമൂഹമാദ്ധ്യമത്തിൽ കുറിപ്പ് പങ്കുവച്ചിരുന്നു. ” ദ ഇന്ത്യൻ എർത്ത്ക്വെയ്ക്” എന്നാണ് അദ്ദേഹം ഗുകേഷിനെ വിശേഷിപ്പിച്ചത്.