ലക്നൗ: രാജ്യത്തിന്റെ വികസനമാണ് കേന്ദ്രസർക്കാർ ലക്ഷ്യം വയ്ക്കുന്നതെന്ന് ഒരിക്കൽ കൂടി ആവർത്തിച്ച് പ്രധാനമന്ത്രി നരേന്ദ്രമോദി. അടുത്ത 25 വർഷത്തേക്ക് ഭാരതം എങ്ങനെയായിരിക്കണമെന്ന വ്യക്തമായ ധാരണ ബിജെപിക്കുണ്ടെന്നും പ്രധാനമന്ത്രി വ്യക്തമാക്കി. ഉത്തർപ്രദേശിലെ ഇറ്റാവയിൽ നടന്ന പൊതുസമ്മേളനത്തെ അഭിസംബോധന ചെയ്യുകയായിരുന്നു അദ്ദേഹം.
” കഴിഞ്ഞ 10 വർഷത്തെ എന്റെ ഭരണം നിങ്ങൾ കണ്ടു. അടുത്ത 5 വർഷത്തേക്കും നിങ്ങൾ മോദിയെ തന്നെ തെരഞ്ഞെടുക്കുകയാണെങ്കിൽ കേവലം അഞ്ച് വർഷത്തേക്കുള്ള രാജ്യത്തിന്റെ യാത്രയായിരിക്കില്ല അത്. വരുന്ന 25 വർഷത്തേക്കുള്ള രാജ്യത്തിന്റെ വികസനം എങ്ങനെയായിരിക്കണമെന്ന കൃത്യമായ അവബോധം ഇന്ന് ബിജെപിക്കുണ്ട്. ഞാൻ ജീവിച്ചാലും ഇല്ലെങ്കിലും ഈ രാജ്യം എന്നും നിലനിൽക്കും.”- പ്രധാനമന്ത്രി പറഞ്ഞു.
കോൺഗ്രസും സമാജ്വാദി പാർട്ടിയും അവർക്കും അവരുടെ മക്കൾക്കും വേണ്ടി രാജ്യം ഭരിക്കാൻ ആഗ്രഹിക്കുന്നു. എന്നാൽ തന്റെ 10 വർഷത്തെ ഭരണത്തിൽ ജനങ്ങളുടെ അനുഗ്രഹം മാത്രമാണ് നേടിയിട്ടുള്ളതെന്ന് പ്രധാനമന്ത്രി പറഞ്ഞു. കോൺഗ്രസും സമാജ്വാദിയും രാജ്യത്തെ ജനങ്ങൾക്കായി എന്ത് ചെയ്തെന്നും പ്രധാനമന്ത്രി ചോദിച്ചു. തനിക്കോ യോഗി ആദിത്യനാഥിനോ അനന്തരാവകാശികളില്ല. തങ്ങളുടെ സ്വത്തുക്കൾ ജനങ്ങളാണെന്നും രാജ്യത്തെ സേവിക്കാനാണ് ആഗ്രഹമെന്നും പ്രധാനമന്ത്രി വ്യക്തമാക്കി.
പാവപ്പെട്ട ജനങ്ങൾക്ക് നല്ല വീടുകൾ, ശൗചാലയങ്ങൾ, വൈദ്യുതി, ഗ്യാസ്, വെള്ളം തുടങ്ങിയവ ലഭിക്കുന്നുണ്ടെന്ന് കേന്ദ്രസർക്കാർ ഉറപ്പു വരുത്തും. എന്നാൽ കോൺഗ്രസ് അധികാരത്തിലേറിയാൽ സ്വാർത്ഥ താത്പര്യങ്ങൾ നിറവേറ്റാൻ മാത്രമേ അവർ ശ്രമിക്കുകയുള്ളൂവെന്നും പ്രധാനമന്ത്രി വ്യക്തമാക്കി.
