ന്യൂഡൽഹി: പൂഞ്ചിൽ നടന്ന ഭീകരാക്രമണം മുൻകൂട്ടി ആസൂത്രണം ചെയ്തതാണെന്ന പഞ്ചാബ് മുൻ മുഖ്യമന്ത്രി ചരൺജിത്ത് സിംഗ് ഛന്നിയുടെ വിവാദ പരാമർശത്തിൽ രൂക്ഷ വിമർശനവുമായി ബിജെപി ദേശീയ വക്താവ് അജയ് അലോക്. കോൺഗ്രസിന്റെ സംസ്കാരമാണ് പരാമർശത്തിലൂടെ പ്രകടമായതെന്നും ഛന്നിയുടെ മനസിന്റെ നിയന്ത്രണം നഷ്ടപ്പെട്ടിരിക്കുകയാണെന്നും അജയ് അലോക് തുറന്നടിച്ചു. വാർത്താ ഏജൻസിയായ എഎൻഐയോട് പ്രതികരിക്കുകയായിരുന്നു അദ്ദേഹം.
” ഒരു മുൻ മുഖ്യമന്ത്രിയാണ് ഇത്തരത്തിൽ ഹീനമായ പരാമർശം നടത്തിയിരിക്കുന്നതെന്ന് നിങ്ങൾ ഓർക്കണം. കോൺഗ്രസിന്റെ സംസ്കാരം എന്താണെന്ന് ഇതിലൂടെ വ്യക്തമാകുന്നു. ഛന്നിയുടെ ബുദ്ധി നഷ്ടപ്പെട്ടിരിക്കുകയാണ്. രാജ്യത്തിന് വേണ്ടി ജീവൻ ത്യജിക്കുന്ന സൈനികരെ ചീപ്പ് പബ്ലിസിറ്റിക്കും രാഷ്ട്രീയത്തിനും വേണ്ടി ഉപയോഗിക്കാൻ കോൺഗ്രസിന് മാത്രമേ സാധിക്കുകയുള്ളൂ. പൂഞ്ചിൽ നടന്ന ഭീകരാക്രമണത്തിൽ ഒരു ജവാൻ കൊല്ലപ്പെട്ടു. നാല് പേർക്ക് ഗുരുതരമായി പരിരക്കേറ്റു. ഈ സാഹചര്യത്തിലും മുൻകൂട്ടി ആസൂത്രണം ചെയ്ത വെറുമൊരു സ്റ്റണ്ടാണെന്നാണ് കോൺഗ്രസ് ആരോപിക്കുന്നത്.”- അജയ് അലോക് പറഞ്ഞു.
ജമ്മുകശ്മീരിലെ പൂഞ്ചിൽ നടന്നത് മുൻകൂട്ടി ആസൂത്രണം ചെയ്ത വെറുമൊരു സ്റ്റണ്ടാണെന്നായിരുന്നു ഛന്നി ആരോപിച്ചത്. തെരഞ്ഞെടുപ്പ് അടുത്തതിനാൽ ബിജെപി മുൻകൂട്ടി ആസൂത്രണം ചെയ്തതാണ് ഈ സ്റ്റണ്ടെന്ന വിചിത്ര വാദവും ഛന്നി ഉന്നയിച്ചിരുന്നു. വിവാദത്തിൽ കടുത്ത പ്രതിഷേധം അറിയിച്ച് കേന്ദ്രമന്ത്രി അനുരാഗ് ഠാക്കൂറും മറ്റ് പ്രമുഖ നേതാക്കാളും രംഗത്തെത്തിയിരുന്നു.