വാഷിംഗ്ടൺ: പ്രശസ്ത പരമ്പരയായ ഗെയിം ഓഫ് ത്രോൺസിൽ കെവൻ ലാനിസ്റ്ററായി പ്രേക്ഷകർക്ക് മുന്നിൽ എത്തിയ ഇയാൻ ഗെൽഡർ അന്തരിച്ചു. 74 വയസായിരുന്നു. പിത്തനാളിയിൽ ബാധിച്ച അർബുദത്തെ തുടർന്നായിരുന്നു മരണം. അഞ്ച് മാസം മുമ്പാണ് ഇയാന് അർബുദം സ്ഥിരീകരിച്ചത്. തുടർന്ന് ചികിത്സയിലിരിക്കെയായിരുന്നു അന്ത്യം.
പങ്കാളിയും സഹനടനുമായ ബെൻ ഡാനിയൽസാണ് ഇയാന്റെ വിയോഗം ലോകത്തെ അറിയിച്ചത്. ” ഹൃദയം നുറുങ്ങുന്ന വേദനയിലാണ് ഞാൻ ഇത് എഴുതുന്നത്. എന്റെ ജീവിത പങ്കാളിയായ ഇയാൻ ഗെൽഡർ കാൻസർ എന്ന വേദനാജനകമായ ലോകത്തിൽ നിന്ന് വിടപറഞ്ഞിരിക്കുന്നു. അഞ്ച് മാസങ്ങൾക്ക് മുമ്പാണ് അർബുദം ബാധിച്ച വിവരം ഞങ്ങൾ അറിഞ്ഞത്. എന്നിരുന്നാലും അദ്ദേഹം സധൈര്യം പോരാടി. ഇപ്പോൾ വിശ്രമിക്കാനുള്ള സമയമായി. എന്റെ പ്രിയപ്പെട്ട ചിയാനി.., നന്നായി വിശ്രമിക്കൂ..”- ഇരുവരുടെയും ചിത്രം പങ്കുവച്ച് ബെൻ ഡാനിയൽസ് കുറിച്ചു.
View this post on Instagram
ഗെയിം ഓഫ് ത്രോൺസിന്റെ 12 എപ്പിസോഡുകളിൽ ഇയാൻ പ്രേക്ഷകർക്ക് മുന്നിൽ എത്തിയിരുന്നു. അടുത്തതായി പുറത്തിറങ്ങുന്ന ദി ലോർഡ് ഓഫ് ദ റിംഗ്സ്: ദി റിംഗ്സ് ഓഫ് പവർ സീസൺ2ലും അദ്ദേഹം പ്രധാന വേഷത്തിലെത്തുന്നുണ്ട്.
