വിഷു റിലീസ് ചിത്രങ്ങൾ ഒന്നിനുപിറകെ മറ്റൊന്നായി ഒടിടിയിൽ എത്തുകയാണ്. 100 കോടി ക്ലബ്ബിൽ കയറിയ ആവേശം ഇന്നലെ മുതൽ ഒടിടിയിൽ സ്ട്രീമിംഗ് ആരംഭിച്ചിരുന്നു. ഇപ്പോഴിതാ അക്കൂട്ടത്തിൽ മറ്റൊരു ചിത്രത്തിന്റെ കൂടി ഒടിടി റിലീസ് പ്രഖ്യാപിച്ചിരിക്കുകയാണ്. ഉണ്ണി മുകുന്ദൻ നായകനായി എത്തിയ ജയ് ഗണേഷാണ് ഒടിടി റിലീസ് പ്രഖ്യാപിച്ചിരിക്കുന്നത്.
മനോരമ മാക്‌സിലൂടെയായിരിക്കും ചിത്രം സ്ട്രീമിംഗ് നടത്തുക. ചിത്രം ഉടൻ എത്തുമെന്ന വിവരം മാത്രമാണ് ഇപ്പോൾ പുറത്തുവിട്ടിരിക്കുന്നത്. ഒടിടി റിലീസ് തീയതി പ്രഖ്യാപിച്ചിട്ടില്ല. ഏപ്രിൽ 11നാണ് ചിത്രം തിയേറ്ററുകളിൽ എത്തിയത്. മഹിമ നമ്പ്യാർ ആയിരുന്നു ചിത്രത്തിലെ നായിക. ദിവ്യാംഗന്റെ വേഷത്തിലാണ് ചിത്രത്തിൽ ഉണ്ണി മുകുന്ദൻ എത്തിയത്. താരത്തിന്റെ മികച്ച പ്രകടനം ഏറെ പ്രേക്ഷകപ്രശംസ നേടിയിരുന്നു.
രഞ്ജിത് ശങ്കറാണ് ചിത്രം സംവിധാനം ചെയ്തത്. ഒരു ഇടവേളയ്‌ക്ക് ശേഷം ജോമോളും സിനിമയിൽ ശ്രദ്ധേയമായ വേഷം അവതരിപ്പിച്ചിരുന്നു. ഹരീഷ് പേരടി, അശോകൻ, രവീന്ദ്ര വിജയ്, നന്ദു തുടങ്ങിയവരാണ് മറ്റ് പ്രമുഖ താരങ്ങൾ. ഡ്രീംസ് ആൻഡ് ബിയോണ്ട്, ഉണ്ണിമുകുന്ദൻ ഫിലിംസ് എന്നീ ബാനറുകളിൽ രഞ്ജിത്ത് ശങ്കർ, ഉണ്ണിമുകുന്ദൻ എന്നിവർ ചേർന്ന് നിർമ്മിച്ച ചിത്രത്തിന്റെ ഛായാഗ്രഹണം ചന്ദ്രു ശെൽവരാജ് ആയിരുന്നു.
