ഇസ്ലാമബാദ്: മദ്യനയ കുഭകോണ കേസിൽ ഉപാധികളോടെ ജാമ്യം ലഭിച്ച് പുറത്തിറങ്ങിയ ആംആദ്മി അദ്ധ്യക്ഷനും ഡൽഹി മുഖ്യമന്ത്രിയുമായ അരവിന്ദ് കെജ്രിവാളിനെ പുകഴ്ത്തി മുൻ പാക് മന്ത്രി ഫവാദ് ചൗധരി. മോദി മറ്റൊരു യുദ്ധം കൂടി പരാജയപ്പെട്ടുവെന്നാണ് ജയിൽ മോചിതനായ കെജ്രിവാളിനെ അഭിനന്ദിച്ചുകൊണ്ട് ചൗധരി പറഞ്ഞത്.
ഇന്നലെ ഡൽഹിയിൽ നടന്ന സംഭവവികാസങ്ങൾ വികസിത ഇന്ത്യക്ക് ശുഭവാർത്തയാണെന്നും മുഖ്യമന്ത്രിയെ പ്രശംസിച്ച് അദ്ദേഹം പറഞ്ഞു. മദ്യനയ കുഭകോണ കേസിൽ അറസ്റ്റിലായി 50 ദിവസത്തെ തടവിന് ശേഷം ഇന്നലെയാണ് തെരഞ്ഞെടുപ്പ് പ്രചാരണത്തിനായി ഉപാധികളോടെ ഇളവ് നൽകി കെജ്രിവാളിന് ഡൽഹി റോസ് അവന്യൂ കോടതി ജാമ്യം നൽകിയത്. ഇതിന് പിന്നാലെയാണ് മുൻ പാക് മന്ത്രിയുടെ പ്രശംസ.
ചൗധരി നേരത്തെ കോൺഗ്രസിനെയും ഇത്തരത്തിൽ പുകഴ്ത്തിയിരുന്നു. കോൺഗ്രസ് അധികാരത്തിലെത്തിയാൽ സമ്പത്ത് പുനർവിതരണം ചെയ്യുന്നതിനായി സർവേ നടത്തുമെന്ന് പ്രഖ്യാപനത്തെ സ്വാഗതം ചെയ്തായിരുന്നു അദ്ദേഹത്തിന്റെ പ്രശംസ. രാഹുലിന്റെ മുതു മുത്തച്ഛനായ ജവഹർലാൽ നെഹ്റുവിനെ പോലെ മികച്ച സോഷ്യലിസ്റ്റാണ് രാഹുലെന്നൊക്കെയായിരുന്നു ഫവാദിന്റെ പുകഴ്ത്തൽ.
പാക് മന്ത്രിയുടെ പരാമർശത്തെ പരിഹസിച്ച് കേന്ദ്രമന്ത്രിമാർ രംഗത്തെത്തിയിരുന്നു. ഫവാദ് അടക്കമുള്ള മുതിർന്ന നേതാക്കൾ വരെ രാഹുലിന്റെ ഫാനാണെന്നും നോൺ- സ്റ്റോപ്പ് പ്രശംസകൾക്ക് അഭിനന്ദനമെന്നാണ് കേന്ദ്രമന്ത്രി കിരൺ റിജിജു പരിഹസിച്ചത്. കോൺഗ്രസും പാകിസ്താനുമായുള്ള സഹകരണമാണ് ഇതിലൂടെ പുറത്തുവരുന്നതെന്നായിരുന്നു പ്രധാനമന്ത്രി പറഞ്ഞത്.
