രാജസ്ഥാൻ റോയൽസിന്റെ നായകനെന്ന നിലയിലും താരമെന്ന നിലയിലും സഞ്ജു സാംസണോട് എന്നും മലയാളികൾക്ക് പ്രത്യേക ആരാധനയാണ്. താരത്തോടുള്ള ആരാധനയിൽ വീടിന്റെ ടെറസിൽ പാലക്കാട് സ്വദേശി വരച്ച ചിത്രമാണ് സമൂഹമാദ്ധ്യമങ്ങളിൽ വെെറൽ. ഡ്രോൺ ഉപയോഗിച്ചാണ് വീഡിയോ പകർത്തിയിരിക്കുന്നത്. ആകാശദൃശ്യങ്ങളിലൂടെ സഞ്ജുവിന്റെ പടുകൂറ്റൻ ചിത്രവും കാണാം.
സുജിത്ത് ചിത്രം വരയ്‌ക്കുന്ന രീതിയിലാണ് വീഡിയോ. സഞ്ജുവിനെയും രാജസ്ഥാൻ റോയൽസിനെയും ടാഗ് ചെയ്താണ് വീഡിയോ പങ്കുവച്ചിരിക്കുന്നത്. പോസ്റ്റിന് താഴെ സുജിത്തിനെ അഭിനന്ദിച്ച് ഡാ മോനേ സുജിത്തേ എന്ന കമന്റുമായി സഞ്ജുവുമെത്തി.
View this post on Instagram
“>
അണ്ണൻ കണ്ടു മക്കളെ, രാജസ്ഥാന്റെ പേജിൽ വീഡിയോ പങ്കുവയ്‌ക്കാൻ പറയൂ എന്നിങ്ങനെയുള്ള കമന്റുകളാണ് സഞ്ജുവിന്റെ കമന്റിന് താഴെ ആരാധകർ പങ്കുവയ്‌ക്കുന്നത്. വീഡിയോയുടെ പശ്ചാത്തലത്തിൽ ആവേശം സിനിമയിലെ സൽപുത്രൻ പിറന്നെടാ എന്ന പാട്ടും കേൾക്കാം. ക്രിസ്റ്റ്യാനോ റൊണാൾഡോയെയും കേരളാ ബ്ലാസ്റ്റേഴ്സ് മുൻ പരിശീലകൻ ഇവാൻ വുകമനോവിച്ചിനെയും വരയ്‌ക്കുന്നതിന്റെ വീഡിയോ നേരത്തെ സുജിത്ത് ഇൻസ്റ്റഗ്രാമിൽ പങ്കുവച്ചിരുന്നു.
തുമ്പ സെന്റ് സേവേഴ്യസ് കോളേജ് ഗ്രൗണ്ടിലും നേരത്തെ സഞ്ജുവിന്റെ പടുകൂറ്റൻ ചിത്രമുയർന്നിരുന്നു. 12 മത്സരങ്ങളിൽ 16 പോയിന്റുള്ള രാജസ്ഥാൻ പ്ലേ ഓഫ് ഉറപ്പിക്കാനുള്ള ശ്രമത്തിലാണ്. ഒരു മത്സരം കൂടി ജയിച്ചാൽ രാജസ്ഥാന് പ്ലേ ഓഫ് ഉറപ്പിക്കാം. നിലവിൽ 486 റൺസുമായി ഐപിഎൽ റൺവേട്ടക്കാരിൽ അഞ്ചാമതാണ് താരം. മികച്ച പ്രകടനം പുറത്തെടുത്തതിന് പിന്നാലെയാണ് ടി20 ലോകകപ്പിനുള്ള ടീമിൽ സഞ്ജു ഇടം നേടിയത്.
