രജനികാന്തിനെ നായകനാക്കി ലോകേഷ് കനകരാജ് സംവിധാനം ചെയ്യുന്ന ചിത്രമാണ് കൂലി. ലോകേഷ്-രജനി കൂട്ടുകെട്ടിലൊരുങ്ങുന്ന ചിത്രത്തിനായി ആരാധകരും ഏറെ കാത്തിരിപ്പിലാണ്. ചിത്രത്തിന്റെ പുതിയ അപ്ഡേറ്റാണ് അണിയറ പ്രവർത്തകർ പങ്കുവക്കുന്നത്. സിനിമയുടെ ഷൂട്ടിംഗ് ജൂൺ ആറിന് തുടങ്ങുമെന്നാണ് പുറത്തുവരുന്ന വിവരം. ചെന്നൈയിലായിരിക്കും ചിത്രീകരണം ആരംഭിക്കുക.
രജനികാന്തും ലോകേഷ് കനകരാജും ആദ്യമായി ഒന്നിക്കുന്ന ചിത്രം കൂടിയാണിത്. സൺ പിക്ചേഴ്സിന്റെ ബാനറിൽ കലാനിധി മാരനാണ് ചിത്രം നിർമിക്കുന്നത്. സ്വർണക്കടത്തുമായി ബന്ധപ്പെട്ട കഥയാണ് ചിത്രത്തിൽ പറയുന്നത്. അധോലോക നായകനായിട്ടാണ് രജനികാന്ത് ചിത്രത്തിൽ എത്തുന്നത്. അനിരുദ്ധാണ് ചിത്രത്തിന് സംഗീതം പകരുന്നത്. ചിത്രത്തിൽ വൻ താരനിര തന്നെ എത്തുമെന്നാണ് വിവരം.
രജനികാന്ത് പ്രധാന വേഷത്തിലെത്തുന്ന വേട്ടയ്യൻ എന്ന ചിത്രത്തിന്റെ ഷൂട്ടിംഗ് പൂർത്തിയാക്കിയ വിവരം താരം പങ്കുവച്ചിരുന്നു. ജ്ഞാനവേലിന്റെ സംവിധാനത്തിലൊരുങ്ങുന്ന ചിത്രം ഒക്ടോബറിലാണ് തിയേറ്ററുകളിലെത്തുന്നത്. മലയാളത്തിന്റെ പ്രിയ താരങ്ങളായ മഞ്ജു വാര്യരും ഫഹദ് ഫാസിലും വേട്ടയ്യനിൽ പ്രധാന വേഷത്തിലെത്തുന്നുണ്ട്. ഇവരെ കൂടാതെ അമിതാഭ് ബച്ചൻ, റാണ ദഗ്ഗുബതി, ദുഷാര വിജയൻ തുടങ്ങിവരും ചിത്രത്തിലുണ്ട്.
