ന്യൂഡൽഹി : ജമ്മു കശ്മീരിലെ ബാരാമുള്ള ലോക്സഭാ മണ്ഡലത്തിൽ ഉയർന്ന പോളിംഗ് ശതമാനം രേഖപ്പെടുത്തിയതിന് പിന്നാലെ വോട്ടർമാരെ അഭിനന്ദിച്ച് പ്രധാനമന്ത്രി നരേന്ദ്രമോദി. ഇത്തരത്തിലുള്ള സജീവ പങ്കാളിത്തം പ്രതീക്ഷ നൽകുന്ന കാര്യമാണെന്നും പ്രധാനമന്ത്രി സമൂഹമാദ്ധ്യമത്തിൽ കുറിച്ചു. അഞ്ചാം ഘട്ടത്തിൽ ബാരാമുള്ളയിൽ 55.79 ശതമാനം പോളിംഗ് ആണ് രേഖപ്പെടുത്തിയത്.
ഉയർന്ന വോട്ടിംഗ് ശതമാനം ജനങ്ങളുടെ അടിയുറച്ച വിശ്വാസത്തെയാണ് പ്രതിഫലിപ്പിക്കുന്നതെന്ന് ലെഫ്.ഗവർണറും പറഞ്ഞു. ” ബാരാമുള്ള ലോക്സഭാ മണ്ഡലത്തിൽ 58 ശതമാനത്തിലധികം വോട്ടിംഗ് രേഖപ്പെടുത്തിയത് പ്രോത്സാഹനജനകമായ കാര്യമാണ്. ജനങ്ങളുടെ നിശ്ചയദാർഢ്യത്തേയും, ജനാധിപത്യത്തിലുള്ള വിശ്വാസത്തേയുമാണ് ഇത് പ്രതിഫലിപ്പിക്കുന്നത്. ജനാധിപത്യത്തിന്റെ മഹാകുംഭമേളയിൽ പങ്കെടുത്ത ബാരാമുള്ളയിലെ ജനങ്ങളെ അഭിനന്ദിക്കുകയും നന്ദി അറിയിക്കുകയും ചെയ്യുന്നു” എന്നായിരുന്നു ലെഫ്.ഗവർണറുടെ പോസ്റ്റ്.
ഇൗ കുറിപ്പിനോട് പ്രതികരിച്ചായിരുന്നു പ്രധാനമന്ത്രിയുടെ ട്വീറ്റ്. ജനാധിപത്യമൂല്യങ്ങളോട് കാണിക്കുന്ന പ്രതിബദ്ധതയ്ക്ക് ബാരാമുള്ളയിലെ സഹോദരീ സഹോദരന്മാരെ അഭിനന്ദിക്കുന്നു. ജനങ്ങൾ ഈ ഉത്സവത്തിൽ സജീവമായി പങ്കെടുത്തു എന്നത് തന്നെ മികച്ച പ്രവണതയാണെന്നും” പ്രധാനമന്ത്രി കുറിച്ചു. തെരഞ്ഞെടുപ്പ് കമ്മീഷന്റെ കണക്കുകൾ പ്രകാരം കഴിഞ്ഞ 35 വർഷത്തിനിടെ നടന്ന ലോക്സഭാ തെരഞ്ഞെടുപ്പുകളിൽ ബാരാമുള്ളയിൽ രേഖപ്പെടുത്തിയ ഏറ്റവും ഉയർന്ന പോളിംഗ് ആണിത്. ഇക്കുറി ശ്രീനഗറിലും ഉയർന്ന പോളിംഗ് ആണ് രേഖപ്പെടുത്തിയത്. ആർട്ടിക്കിൾ 370 റദ്ദാക്കിയതിന് ശേഷമുള്ള ആദ്യ പൊതുതെരഞ്ഞെടുപ്പാണ് ഇപ്പോൾ നടക്കുന്നത്.
