സീസണിലെ രണ്ടാം പകുതിയിൽ നടത്തിയ അപരാജിത കുതിപ്പിന്റെ ആത്മവിശ്വാസത്തിലാണ് ഇന്നലെ റോയൽ ചലഞ്ചേഴ്സ് ബെംഗളൂരു എലിമിനേറ്റർ കളിക്കാനായി ഇറങ്ങിയത്. എന്നാൽ 17-ാം സീസണിലും രാജാവിനും പോരാളികൾക്കും കപ്പില്ലാതെ മടങ്ങാനായിരുന്നു വിധി. 4 വിക്കറ്റിനായിരുന്നു ആർസിബിക്കെതിരെ രാജസ്ഥാന്റെ ജയം. രണ്ടാം ക്വാളിഫയറിന് യോഗ്യത നേടിയത് കേക്ക് മുറിച്ചാണ് റോയൽസ് താരങ്ങൾ ആഘോഷിച്ചത്. നായകൻ സഞ്ജു സാംസണും രവിചന്ദ്രൻ അശ്വിനും കേക്ക് മുറിച്ച് വിജയം ആഘോഷിക്കുന്നതിന്റെ വീഡിയോ രാജസ്ഥാൻ തങ്ങളുടെ സമൂഹമാദ്ധ്യമ അക്കൗണ്ടുകളിൽ പങ്കുവച്ചിട്ടുണ്ട്.
Good night, Royals fam 🎂💗 pic.twitter.com/ruPkXzB4hd
— Rajasthan Royals (@rajasthanroyals) May 22, 2024
“>
മാൻ ഓഫ് ദി മാച്ച് പുരസ്കാരം നേടിയതിന് പിന്നാലെ വളരെ ആത്മവിശ്വാസത്തോടെയാണ് അശ്വിൻ സംസാരിച്ചത്. കഴിഞ്ഞ മത്സരങ്ങളിൽ ടീമിന് മികച്ച പ്രകടനം കാഴ്ചവക്കാനായില്ലെന്നും മികച്ച സ്കോറുകൾ നേടാനായില്ലെന്നും അശ്വിൻ പറഞ്ഞു. ബട്ലറെ ടീമിന് നഷ്ടമായതും ഹെറ്റ്മെയറിന് പരിക്കേറ്റതും തിരിച്ചടിയായി. ബെംഗളൂരുവിനെതിരായ ജയം ഞങ്ങൾക്ക് വളരെയധികം പ്രധാനപ്പെട്ടതാണെന്നും ആത്മവിശ്വാസം നൽകുന്നതാണെന്നും താരം കൂട്ടിച്ചേർത്തു.
”സീസണിന്റെ ആദ്യപകുതിയിൽ എന്റെ ശരീരം മത്സരത്തിന് വേണ്ടവിധം വഴങ്ങിയിരുന്നില്ല. അടിവയറിനേറ്റ പരിക്ക് തനിക്ക് ബുദ്ധിമുട്ടുണ്ടാക്കി. പ്രായം കൂടി വരികയാണ്. ടെസ്റ്റ് ക്രിക്കറ്റിൽ നിന്ന് ടൂർണമെന്റിലേക്ക് വരുന്നത് പ്രയാസകരമായ കാര്യമാണ്. ബൗളിംഗ് താളം കണ്ടെത്താൻ എനിക്ക് കുറച്ച് സമയം ആവശ്യമാണ്”.- അശ്വിൻ പറഞ്ഞു.
നാളെ ചെന്നൈയിൽ നടക്കുന്ന ക്വാളിഫയർ 2ൽ സൺറൈസേഴ്സ് ഹൈദരാബാദാണ് രാജസ്ഥാന്റെ എതിരാളികൾ. ഈ മത്സരത്തിലെ വിജയികൾ ഞായറാഴ്ച നടക്കുന്ന ഫൈനലിൽ കൊൽക്കത്ത നൈറ്റ് റൈഡേഴ്സിനെ നേരിടും.
