ടി20 ലോകകപ്പിനുള്ള സ്ക്വാഡ് പ്രഖ്യാപിക്കാനാകാതെ പാകിസ്താൻ ക്രിക്കറ്റ് ടീം. സെലക്ടർമാരും പാകിസ്താൻ ക്രിക്കറ്റ് ബോർഡ് ചെയർമാനുമായുള്ള തമ്മിലടിയാണ് കാരണം. സ്ക്വാഡ് പ്രഖ്യാപിക്കാനുള്ള ശ്രമം ചെയർമാൻ മൊഹ്സിൻ നഖ്വി ഇടപെട്ട് തടഞ്ഞുവെന്ന് ജിയോ ന്യൂസ് വ്യക്തമാക്കുന്നു. പ്രഖ്യാപനത്തിന് മുൻപ് താൻ അടക്കമുള്ളവരുമായി സെലക്ടർമാർ മീറ്റിംഗോ ചർച്ചയോ നടത്തിയില്ലെന്ന് പറഞ്ഞാണ് പ്രഖ്യാപനം തടഞ്ഞത്.
കുട്ടി ക്രിക്കറ്റിന്റെ ലോകകപ്പിൽ ഇതുവരെയും ടീമിനെ പ്രഖ്യാപിക്കാത്ത ടീം പാകിസ്താനാണ്. വഹാബ് റിയാസും മൊഹമ്മദ് യൂസുഫും ക്യാപ്റ്റനും ചേർന്നാണ് ടീമിനെ തീരുമാനിച്ചതെന്നും മുഴുവൻ കമ്മിറ്റിയെ ഉൾപ്പെടുത്തിയല്ല തിരഞ്ഞെടുപ്പ് നടത്തിയതെന്നുമാണ് റിപ്പോർട്ട്.മേയ് 25-നാണ് സ്ക്വാഡ് പ്രഖ്യാപിക്കാനുള്ള അവസാന തീയതി. ഇന്ന് അർദ്ധരാത്രിയോ നാളെ രാവിലെയോ തർക്കം പരിഹരിച്ച് ടീം പ്രഖ്യാപിക്കുമെന്നാണ് കരുതുന്നത്.
ഗ്രൂപ്പ് എയിൽ ഇന്ത്യക്കും അമേരിക്കയ്ക്കും അയർലൻഡിനും കാനഡയ്ക്കുമൊപ്പമാണ് പാകിസ്താൻ.
ജൂൺ ആറിന് യുഎസ്എയ്ക്കെതിരെയാണ് അവരുടെ ആദ്യ മത്സരം. ന്യൂയോർക്കിൽ ജൂൺ 9നാണ് ഇന്ത്യക്കെതിരെയുള്ള മത്സരം. ടി20ക്ക് മുന്നോടിയായി വിൻഡീസ് ഇതിഹാസം വിവ് റിച്ചാർഡ്സിനെ മെൻ്ററായി കൊണ്ടുവരാൻ പാകിസ്താൻ ശ്രമിക്കുന്നുണ്ട്.