ന്യൂഡൽഹി: സ്മാർട്ട്ഫോൺ നിർമാണ രംഗത്ത് ഇന്ത്യക്ക് നേട്ടങ്ങളുടെ കാലം. ആപ്പിൾ ഐഫോണിന് പിന്നാലെ ഗൂഗിൾ പിക്സലും ഇനി ഇന്ത്യയിൽ നിർമിക്കും. തായ്വാൻ നിർമാതാക്കളായ ഫോക്സ്കോൺ ടെക്നോളജി ഗ്രൂപ്പാണ് ഗൂഗിളിനായി ഫോണുകൾ നിർമിക്കുക. ചൈനയിൽ നിർമാണ ഫാക്ടറി ആരംഭിക്കുന്നായിരുന്നു ആദ്യ റിപ്പോർട്ടുകൾ. പിന്നീട് ഗൂഗിൾ തീരുമാനം മാറ്റുകയായിരുന്നു.
2023-ളാണ് ഇന്ത്യയിൽ പിക്സൽ 8 സ്മാർട്ട്ഫോണുകളുടെ നിർമാണം ആരംഭിക്കുമെന്ന് ഗൂഗിൾ പ്രഖ്യാപിച്ചത്. ഇതിന് പിന്നാലെയാണ് ഫോക്സ്കോണിന്റെ തമിഴ്നാട് യൂണിറ്റിൽ ഇതിനുള്ള പ്രാരംഭ പ്രവർത്തനങ്ങൾ ആരംഭിച്ചത്. സെപ്തംബർ മുതൽ ഫോണുകളുടെ ഉൽപാദനം ആരംഭിക്കും സമാന്തരമായി കയറ്റുമതിക്കും തുടക്കമിടും. ഇന്ത്യൻ കമ്പനിയായ ഡിക്സണിനും പിക്സൽ സ്മാർട്ട്ഫോണുകൾ നിർമിക്കാനുള്ള കരാർ ലഭിച്ചതായും സൂചനകളുണ്ട്.
2024 മാർച്ചിലെ റിപ്പോർട്ട് പ്രകാരം ഗൂഗിൾ പിക്സലിന്റെ ഇന്ത്യയിലെ വിപണി വിഹിതം 0.04 ശതമാനമാണ്. ഇന്ത്യയിൽ ഉൽപ്പാദനം ആരംഭിക്കുന്നതോടെ വിപണയിൽ സാന്നിദ്ധ്യം ശക്തമാക്കാമെന്നാണ് ഗൂഗിളിന്റെ കണക്കുകൂട്ടൽ. ഇറക്കുമതി തീരുവ ലാഭിക്കുന്നതിലൂടെ ഫോണുകളുടെ വിലയിലും കാര്യമായ കുറവുണ്ടാകും.
നിക്ഷേപക സാഹചര്യം അനുകൂലമായതിന് പിന്നാലെ വിദേശ കമ്പനികൾ ഇന്ത്യയിൽ പ്രവർത്തനം വ്യാപിപ്പിക്കാൻ മത്സരിക്കുകയാണ്. ഒരു കാലത്ത് ചൈനയിലായിരുന്ന ഐ ഫോണുകളുടെ ഉത്പാദനത്തിന്റെ സിംഹഭാഗവും ഇപ്പോൾ ഇന്ത്യയിലാണ് നടക്കുന്നത്.
നിലവിൽ സ്മാർട്ട്ഫോണുകൾ രാജ്യത്തിന്റെ നാലാമത്തെ കയറ്റുമതി ഉൽപ്പന്നമാണ്.. 2023-24 സാമ്പത്തിക വർഷത്തിൽ 1560 കോടി ഡോളറിന്റെ (1.3 ലക്ഷം കോടി രൂപ) മൊബൈൽ ഫോണുകളാണ് മറ്റ് രാജ്യങ്ങളിലേക്ക് അയച്ചത്
