വേനലായിരുന്നപ്പോൾ ഒന്ന് മഴ പെയ്തിരുന്നെങ്കിലെന്ന് ആശിച്ചു, എന്നാൽ അടുപ്പിച്ച് നാല് ദിവസം മഴ പെയ്തതോടെ ആ മോഹം അവസാനിച്ചു എന്നുള്ളതാണ് മലയാളികളുടെ ഇപ്പോഴത്തെ അവസ്ഥ. വെള്ളക്കെട്ടും വെള്ളപ്പൊക്കവുമൊക്കെയായി സംസ്ഥാനത്തൊട്ടാകെ മഴക്കെടുതിയാണ്. മഴക്കാലമാകുമ്പോൾ വിളിക്കാതെ വീട്ടിലേക്ക് വരുന്ന മറ്റൊരു അതിഥി കൂടിയുണ്ട്. ഈച്ച!
അടുക്കളയിലും മുറികളിലും മേശപ്പുറത്തും തുടങ്ങി എല്ലായിടത്തും ഇപ്പോൾ ഈച്ച ശല്യമാണ്. മഴ കനത്തതോടെയാണ് ഇവയുടെ ശല്യം രൂക്ഷമായത്. ഭക്ഷണ സാധനങ്ങളിലും വസ്ത്രങ്ങളിലും അടുക്കള ഉപകരണങ്ങളിലുമൊക്കെ ഈച്ചകൾ കൂട്ടമായെത്തി അരിച്ചുനടക്കും. രോഗം പരത്താൻ മിടുക്കരാണെന്നതിനാൽ ഈച്ചകളെ മാറ്റിനിർത്തേണ്ടത് അത്യാവശ്യവുമാണ്. ഈ മഴക്കാലത്ത് വീടിനുള്ളിലെ ഈച്ച ശല്യം എങ്ങനെ ഒഴിവാക്കാമെന്ന് നോക്കാം..
ഒരു ഗ്ലാസ് വെള്ളത്തിലേക്ക് 3-4 കഷ്ണം കറുവപ്പട്ടയും 10-15 ഗ്രാമ്പൂവും ഇട്ട് തിളപ്പിച്ച് അര ഗ്ലാസ് വെള്ളമാക്കി മാറ്റുക. മറ്റൊരു പാത്രത്തിൽ ഒരു ഗ്ലാസ് വിനാഗിരിയും അത്ര തന്നെ വെള്ളവുമെടുക്കുക. അതിലേക്ക് നേരത്തെ തിളപ്പിച്ചുവച്ച ദ്രാവകം ഒഴിക്കുക.
ഈ മിശ്രിതം ഒരു സ്പ്രേ ബോട്ടിലിലേക്ക് മാറ്റി ഈച്ച വരുന്ന സ്ഥലങ്ങളിൽ അടിച്ചുകൊടുക്കുക. അടുക്കളയിൽ, മേശപ്പുറത്ത് തുടങ്ങി ഈച്ച പറ്റിയിരിക്കുന്ന എല്ലായിടത്തും ഈ സ്പ്രേ അടിക്കാവുന്നതാണ്. ഈച്ചകളെ ഒരുപരിധി വരെ നിയന്ത്രിക്കാം.
