ചർമ്മ സംരക്ഷണത്തിനായി നിരവധി വഴികൾ തേടുന്നവരാണ് മലയാളികൾ. അടുത്തിടയായി ചർമ്മ സംരക്ഷണത്തിനും മുടിയുടെ സംരക്ഷണത്തിനുമായി വിറ്റാമിൻ ഇ കാപ്സ്യൂൾ ഉപയോഗിക്കുന്നവരുടെ എണ്ണത്തിൽ വർധനവ് വന്നിട്ടുണ്ട്. ആരോഗ്യപ്രവർത്തകരുടെ നിർദ്ദേശമില്ലാതെ വിറ്റാമിൻ ഇ കാപ്സ്യൂൾ ഉപയോഗിച്ചാൽ ഗുണത്തിന് പകരം ദോഷങ്ങൾ അനുഭവിക്കേണ്ടി വന്നേക്കാം.
കൊഴുപ്പ് ലയിക്കുന്ന ആന്റിഓക്സിഡന്റിന്റെ ഗുണങ്ങൾ വിറ്റാമിൻ ഇയിൽ ധാരളാമായി ഉണ്ട്. ഇത് ചർമ്മത്തെ സംരക്ഷിക്കാൻ സഹായകമാകുന്നു. ചർമ്മത്തിന്റെ ആരോഗ്യം നിലനിർത്താനും വിറ്റാമിൻ ഇ അത്യന്താപേക്ഷിതമാണ്. വരണ്ട ചർമ്മം, മുടി കൊഴിച്ചിൽ എന്നിവയും വിറ്റാമിൻ ഇ കുറഞ്ഞാൽ ഉണ്ടാകും.
അതുകൊണ്ട് തന്നെ വിറ്റാമിൻ ഇ കാപ്സ്യൂളുകൾ കഴിച്ചാൽ ഗുണകരമാകുമെന്നാണ് പലരുടെയും ധാരണ. ഈ ചിന്താഗതി ഗുണത്തെക്കാൾ ഏറെ ദോഷമാണ് വിളിച്ചു വരുത്തുന്നത്. അമിതമായി വിറ്റാമിൻ ഇ കാപ്സ്യൂൾ കഴിച്ചാൽ ഉയർന്ന രക്തസമ്മർദ്ദം , ഓക്കാനം, വയറിളക്കം, വയറുവേദന, ക്ഷീണം, തലകറക്കം, കാഴ്ച മങ്ങൽ, തലവേദന എന്നിവയുണ്ടാകും. കൂടാതെ, അർബുദത്തിന് വരെ കാരണമാകുമെന്നാണ് പഠനങ്ങളിൽ പറയുന്നത്.
കാപ്സ്യൂളുകൾ ഉപയോഗിക്കുന്നതിന് പകരം വിറ്റാമിൻ ഇ അടങ്ങിയ ഭക്ഷണം കഴിക്കുന്നതാണ് കൂടുതൽ നല്ലത്. ബദാം, പപ്പായ, പച്ചക്കറി, മുട്ട, മാംസം എന്നിവയിൽ വിറ്റാമിൻ ഇ അടങ്ങിയിട്ടുണ്ട്. ഫൈബറും മഗ്നീഷ്യവും വിറ്റാമിന് ഇ-യും അടങ്ങിയ സൂര്യകാന്തി വിത്തുകളും ഡയറ്റില് ഉൾപ്പെടുത്താം.
