നാദിർഷായുടെ സംവിധാനത്തിലൊരുങ്ങുന്ന ‘വൺസ് അപ്പോൺ എ ടൈം ഇൻ കൊച്ചി’ എന്ന ചിത്രത്തിന്റെ ട്രെയിലർ പുറത്തിറങ്ങി. നാളെയാണ് ചിത്രം തിയേറ്ററുകളിലെത്തുന്നത്. റാഫിയാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. റാഫിയുടെ മകൻ നായകനാകുന്നുവെന്ന പ്രത്യേകതയും ചിത്രത്തിനുണ്ട്. അർജുൻ അശോകനും ഷൈൻ ടോം ചാക്കോയുമാണ് ചിത്രത്തിൽ പ്രധാന വേഷങ്ങളിലെത്തുന്നത്.
ബാലതാരമായി വന്ന് മലയാളികൾക്ക് സുപരിചിതയായ ദേവിക സഞ്ജയ് ആണ് ചിത്രത്തിലെ നായിക. ഈ ചിത്രത്തിലൂടെ മലയാളികൾക്ക് മുന്നിൽ ഒരു പുതുമുഖ നായകനെ അവതരിപ്പിക്കുകയാണ് നാദിർഷ. കോമഡി ത്രില്ലർ ചിത്രമാണ് വൺസ് അപ്പോൺ എ ടൈം ഇൻ കൊച്ചി. കൊച്ചിയുടെ കഥയാണോ ചിത്രം പ്രേക്ഷകർക്ക് മുന്നിലെത്തിക്കുന്നതെന്ന ചോദ്യവും ട്രെയിലർ പുറത്തുവന്നതിന് ശേഷം ഉയരുന്നുണ്ട്. പൊലീസ് വേഷത്തിലാണ് അർജുൻ അശോകൻ ചിത്രത്തിലെത്തുന്നത്.
ഹിഷാം അബ്ദുൽ വഹാബാണ് ചിത്രത്തിന്റെ സംഗീത സംവിധായകൻ. ഷാജി കുമാറാണ് ചിത്രത്തിന്റെ ഛായാഗ്രഹകൻ. കലന്തൂർ എന്റർടെയിൻമെന്റിന്റെ ബാനറിലാണ് ചിത്രം നിർമിക്കുന്നത്.
