ഝാർഖണ്ഡിലെ പിന്നാക്ക വിഭാഗങ്ങളുടെ ആശ്രയം; ഭർത്താവിന്റെ വിയോഗത്തിന് പിന്നാലെ ആകസ്മികമായി രാഷ്‌ട്രീയത്തിലേക്ക്; ക്യാബിനറ്റ് പദവിയിൽ അന്നപൂർണദേവി

നാരീശക്തിയുടെ ആൾരൂപം. നിർമലാ സീതാരാമൻ കഴിഞ്ഞാൽ‌ മൂന്നാം മോദി മന്ത്രിസഭയിൽ കാബിനറ്റ് പദവി വഹിക്കുന്ന ഒരേയൊരു വനിതാ. ഝാർഖണ്ഡിൽ നിന്ന് റെക്കോർഡ് ഭൂരിപക്ഷത്തിൽ വിജയിച്ചെത്തിയ പെൺ കരുത്ത്. 3.77 ലക്ഷം വോട്ടുകളുടെ ഭൂരിപക്ഷത്തിലാണ് ഈ 55-കാരി വിജയക്കൊടി പാറിച്ചത്. ഇന്നലെ രാഷ്‌ട്രപതി ഭവന്റെ അങ്കണത്തിൽ കാബിനറ്റ് മന്ത്രിയായി സത്യവാചകം ചൊല്ലിയ അന്നപൂർണ ദേവിയെ കുറിച്ച് പറയാനേറെയാണ്.

ആ​ഗ്രഹ പ്രകാരം രാഷ്‌ട്രീയത്തിലെത്തിയ നേതാവല്ല അന്നപൂർണാദേവി, മറിച്ച് ഭർത്താവിന്റെ വിയോ​ഗത്തിലൂടെ ഉണ്ടായ വിള്ളലകറ്റാൻ രാഷ്‌ട്രീയത്തിൽ‌ കാലെടുത്ത് വച്ച പെൺ പുലിയാണവർ. സമൂഹത്തിന്റെ അടിത്തട്ടിലേക്ക് ഇറങ്ങിയുള്ള പ്രവർത്തനം അവരെ ജനപ്രിയയാക്കി.

രാഷ്‌ട്രീയ ജനതാദളിന്റെ (ആർജെഡി) നേതാവായിരുന്നു ഭർത്താവ് രമേഷ് യാദവ്. അദ്ദേഹത്തിന്റെ വിയോ​ഗത്തെ തുടർന്ന് 1998-ലാണ് കൊഡെർമ നിയമസഭാ ഉപതെരഞ്ഞെടുപ്പിലൂടെ രാഷ്‌ട്രീയത്തിലെത്തുന്നത്. അന്ന് മണ്ഡലം ബിഹാറിന്റെ ഭാ​ഗമായിരുന്നു. ഇന്ന് അത് ഝാർഖണ്ഡിലാണ്.

#WATCH | BJP leader Annapurna Devi sworn-in as Union Minister in the Prime Minister Narendra Modi-led NDA government pic.twitter.com/jsGZhstKQs

— ANI (@ANI) June 9, 2024

തുടർന്ന് 2000, 2004, 2005, 2001 വർഷങ്ങളിൽ ആർജെഡിയുടെ നോമിനിയായി ജയിച്ച അന്നപൂർണാദേവി 2012-ൽ ഝാർഖണ്ഡ് സർക്കാരിൽ മന്ത്രിയായി. ഒബിസി യാദവ സമൂഹ​ത്തിൽ പെട്ട അന്നപൂർണാദേവിക്ക് മണ്ഡലത്തിൽ കാര്യമായ സ്വാധീനമുണ്ട്. ന്യൂനപക്ഷ ക്ഷേമത്തിനായി അക്ഷീണം പ്രവർത്തിച്ച അവർക്ക് റെക്കോർഡ് ഭൂരിപ​ക്ഷം നേടിക്കൊടുക്കാൻ കാരണമായത് കൊണെർമ ലോക്സഭ മണ്ഡലത്തിൽ ഉൾപ്പെട്ട ആറ് നിയസഭാ മണ്ഡലങ്ങളിലെ വോട്ടർമാരാണ്.

2014-19 വർഷങ്ങളിൽ ഝാർഖണ്ഡ് ആർ‌ജെഡി അദ്ധ്യക്ഷനായി സേവനമനുഷ്ഠിച്ച അവർ 2019-ലാണ് ബിജെപിയിലെത്തുന്നത്. അതേ വർഷം ലോക്സഭയിലേക്ക് മത്സരിച്ച് 4.55 ലക്ഷം വോട്ടിന്റെ ഭൂരിപക്ഷത്തിലാണ് ജയിച്ചത്. 2021 മുതൽ കേന്ദ്ര വിദ്യാഭ്യാസ സഹമന്ത്രിയായി സേവനമനുഷ്ഠിച്ചു. കുട്ടികളുടെ നൈപുണ്യ വികസനത്തിനായി നിരന്തരം അവർ ശബ്ദമുയർത്തിയിരുന്നു.