ലോക്സഭാ തെരഞ്ഞെടുപ്പിൽ തൃശൂരിലെ ബിജെപി സ്ഥാനാർത്ഥിയായിരുന്ന സുരേഷ് ഗോപി വിജയിക്കണമെന്ന് ആഗ്രഹിച്ചിരുന്നതായി നടൻ ബൈജു . തന്റേതെന്ന പേരിൽ സമൂഹമാദ്ധ്യമങ്ങളിൽ പ്രചരിക്കുന്ന കുറിപ്പുമായി ബന്ധപ്പെട്ട് സ്വകാര്യ മാദ്ധ്യമത്തോട് പ്രതികരിക്കുകയായിരുന്നു അദ്ദേഹം .
‘ സുരേഷ് ഗോപി ചേട്ടൻ വിജയിച്ചതിൽ സന്തോഷമുണ്ട്. അത് അദ്ദേഹത്തിന്റെ സ്വന്തം വിജയമാണ്. അദ്ദേഹം വിജയിക്കണം എന്ന് ഞാൻ ആഗ്രഹിച്ചിരുന്നു. മാത്രമല്ല ഇനി ആ മണ്ഡലത്തിൽ എന്തെങ്കിലുമൊക്കെ വികസനം ഉണ്ടാവുകയും ചെയ്യും ഒരു സംശയവുമില്ല . എന്നുകരുതി സ്വപ്നാടനം നടത്തുന്നതുപോലെ ഉള്ള ആ കുറിപ്പ് ഞാൻ എഴുതിയതായി ആരും പ്രചരിപ്പിക്കരുത്. ഞാൻ സ്വപ്നം കാണാറില്ല.’–ബൈജു പറഞ്ഞു.
കേന്ദ്രത്തിൽ എന്തായാലും ബിജെപിയെ വരികയുള്ളൂവെന്ന് തെരഞ്ഞെടുപ്പിന് മുൻപും പറഞ്ഞ താരമാണ് ബൈജു . മാത്രമല്ല സുരേഷ് ഗോപി ജയിച്ചാൽ തൃശൂർ ജില്ലയ്ക്ക് എന്തെങ്കിലും ഗുണം ഉണ്ടാവും. ജയിക്കാൻ എല്ലാ സാധ്യതയും ഉള്ള ആളാണ് .സുരേഷ് ഗോപി എംപി ആയിരുന്ന കാലത്ത് അദ്ദേഹത്തിന്റെ ഫണ്ട് ഉപയോഗപ്പെടുത്തി ഒരുപാട് സഹായങ്ങൾ ചെയ്തിട്ടുണ്ട്. ഇതു കൂടാതെ സ്വന്തം കയ്യിൽ നിന്ന് പോലും പണം ചിലവാക്കിക്കൊണ്ട് അദ്ദേഹം ഒരുപാട് നല്ല കാര്യങ്ങൾ ചെയ്യുന്നു. അതെല്ലാം അദ്ദേഹത്തിന്റെ നല്ല മനസ്സുകൊണ്ടാണ് എന്നും ബൈജു പറഞ്ഞിരുന്നു.
