മുംബൈ: ശ്രീനാരായണ ധർമ്മ പരിപാലന യോഗം മുംബൈ -താനെ യൂണിയൻ സ്ഥാപക പ്രസിഡന്റ് കെ.പി വിശ്വംഭരൻ (66) നിര്യാതനായി. എസ്എൻഡിപിക്ക് മുംബൈയിലും സമീപ പ്രദേശങ്ങളിലും അടിത്തറ പാകാൻ നേതൃത്വം നൽകിയവരിൽ പ്രധാനിയായിരുന്നു കെ.പി വിശ്വംഭരൻ.
തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലിരിക്കെയായിരുന്നു മരണം. കേരളത്തിന് പുറത്ത് ശ്രീനാരായണ ധർമ്മ പരിപാലന യോഗം എന്ന സംഘടനയ്‌ക്ക് ശാഖകൾ ഉണ്ടാക്കുകയും യൂണിയൻ സ്ഥാപിക്കുകയും ചെയ്ത വ്യക്തിയാണ്. ആദ്യമായി ഡോംബിവലിയിൽ 3823 ആം നമ്പർ ശാഖാ രൂപീകരിച്ചപ്പോൾ അതിന്റെ പ്രസിഡന്റായിരുന്നു കെ.പി.വിശ്വംഭരൻ.
ഭാര്യ- സുധ വിശ്വംഭരൻ അഞ്ജു വിശ്വം ഏകമകളുമാണ്. എസ്എൻഡിപി യോഗം മുംബൈ താനെ യൂണിയൻ,വനിതാസംഘം യൂണിയൻ,വൈദിക സമിതി, ശാഖായോഗങ്ങൾ തുടങ്ങീ വിവിധ സംഘടനകൾ അനുശോചനം രേഖപ്പെടുത്തി. മരണാനന്തര ചടങ്ങുകൾ മാവേലിക്കര അറുനൂറ്റിമംഗലത്തുള്ള വസതിയിൽ നടക്കും.
