ഉയർന്ന വരുമാനമോ, മനസന്തോഷം നൽകുന്ന ജോലിയോ? ഏത് തെരഞ്ഞെടുക്കുമെന്നത് പലപ്പോഴും നമ്മെ എല്ലാം അലട്ടുന്ന കാര്യമാണ്. ഇഷ്ടപ്പെട്ട ജോലി തെരഞ്ഞെടുത്താൽ അതിൽ കാര്യമായ വരുമാനം കണ്ടെത്താൻ സാധിക്കില്ല. എന്നാൽ ഉയർന്ന വരുമാനമുള്ള ജോലി സ്വീകരിച്ചാലോ അതോടെ സമാധാനവും പോകും. പഠനം പൂർത്തിയാക്കി ജോലിയിൽ പ്രവേശിച്ച ഏതൊരാളും ഇത്തരം അവസ്ഥയിലൂടെ കടന്നു പോയിട്ടുണ്ടാവും. ഉയർന്ന ശമ്പളം വേണ്ടെന്ന് വച്ച് മനസിന് സന്തോഷം നൽകുന്ന ജോലികളിൽ ഏർപ്പെട്ടിട്ടുണ്ടോ? ഇല്ലെങ്കിൽ 83 ലക്ഷം രൂപ ശമ്പളം വേണ്ടെന്ന് വച്ച 34 കാരിയെ കുറിച്ച് അറിഞ്ഞോളൂ..
83 ലക്ഷം രൂപ വേണ്ടെന്നു വച്ചെന്ന് കേൾക്കുമ്പോൾ ആരായാലും ഒന്ന് ഞെട്ടും. പക്ഷേ സംഗതി ശരിയാണ്. യുഎസ് പൗരയും 34 കാരിയുമായ വലേരി വാൽകോർട്ടാണ് പ്രതിവർഷം തനിക്ക് ലഭിച്ചിരുന്ന 83 ലക്ഷം രൂപ വേണ്ടെന്ന് വച്ച്, സ്വന്തം ഇഷ്ടപ്രകാരമുള്ള ജോലി തെരഞ്ഞെടുത്തത്. ഗൂഗിൾ, ആമസോൺ തുടങ്ങിയ കോർപ്പറേറ്റ് കമ്പനികളിലായിരുന്നു വലേരി ജോലി ചെയ്ത് വന്നിരുന്നത്. എന്നാൽ ഒരു ഘട്ടമെത്തിയപ്പോൾ വലേരിയ്ക്ക് മാനസിക സമ്മർദ്ദങ്ങൾ അനുഭവപ്പെടാൻ തുടങ്ങി. പിന്നെ ഒന്നും ആലോചിച്ചില്ല, തനിക്ക് ലക്ഷങ്ങൾ നൽകുന്ന ജോലി വിടാൻ തന്നെ അവർ തീരുമാനിച്ചു. എന്നാൽ പിന്നീട് തെരഞ്ഞെടുത്തതാകട്ടെ പേസ്ട്രികൾ നിർമിക്കുന്ന ജോലിയും.
പേസ്ട്രികൾ നിർമിക്കാൻ പഠിക്കുന്നതിനായി ഫ്രാൻസിലെ ഒരു സ്കൂളിലേക്ക് ആപ്ലിക്കേഷൻ അയച്ച് അഡ്മിഷനും അവർ എടുത്തിരുന്നു. തുടർന്ന് ഇവിടെ വച്ച് പേസ്ട്രികൾ നിർമിക്കാൻ പഠിക്കുന്നതിനിടയിൽ ചെലവുകൾ നികത്തുന്നതിനായി ചില പാർട്ട് ടൈം ജോലികളിലും അവർ ഏർപ്പെട്ടു. ആദ്യം ഒരു ഇന്റേണായി പേസ്ട്രി കമ്പനിയിൽ കയറിയ അവർ വൈകാതെ തന്നെ അവിടുത്തെ ഫുൾ ടൈം ജീവനക്കാരിയായി മാറുകയുമായിരുന്നു.
കോർപ്പറേറ്റ് മേഖലയെ അപേക്ഷിച്ച് വരുമാനം കുറവാണെങ്കിലും ഇന്ന് മാനസിക സമ്മർദ്ദങ്ങൾ ഇല്ലെന്നും ഇഷ്ടപ്പെട്ട സ്ഥലങ്ങളിലേക്ക് പ്രകൃതി സൗന്ദര്യം ആസ്വദിച്ച് യാത്ര ചെയ്യാൻ സാധിക്കുന്നുണ്ടെന്ന് വലേരി പറയുന്നു. യുഎസിൽ ഉണ്ടായിരുന്നതിനേക്കാൾ മനോഹരമാണ് തന്റെ ജീവിതമെന്നും ഇനിയും പേസ്ട്രി നിർമാണത്തിൽ വൈവിധ്യങ്ങൾ കണ്ടുപിടിക്കുന്നതിന് ശ്രമിക്കുമെന്നും അവർ പറഞ്ഞു.
