വയനാട്: വനത്തിനുള്ളിൽ അതിക്രമിച്ച് കയറി മാനുകളെ വേട്ടയാടിയ രണ്ട് പേർ പിടിയിൽ. ചീയമ്പം നിവാസിയായ ബാലൻ (60) രാഹുൽ (22) എന്നിവരാണ് പിടിയിലായത്. പുള്ളിമാനിനെയാണ് ഇവർ വേട്ടയാടി പിടികൂടിയത്. പ്രതികളുടെ പക്കൽ നിന്നും മാനിന്റെ ജഡവും വേട്ടയാടാൻ ഉപയോഗിച്ച ആയുധങ്ങളും കണ്ടെടുത്തതായി പൊലീസ് അറിയിച്ചു.
കുറിച്ച്യാട് റെയിഞ്ചിൽ വണ്ടിക്കടവ് ഫോറസ്റ്റ് സ്റ്റേഷൻ പരിധിയിലാണ് സംഭവം നടന്നത്. വനത്തിനുള്ളിൽ പരിശോധനയ്ക്കെത്തിയ ഉദ്യോഗസ്ഥർ സംശയാസ്പദമായ രീതിയിൽ ബാലനെ കാണുകയായിരുന്നു. തുടർന്ന് നടത്തിയ ചോദ്യം ചെയ്യലിലാണ് മാനിനെ വേട്ടയാടാനെത്തിയതാണെന്ന് മനസിലായത്. ഇതോടെ പരിസരം പരിശോധിച്ച ഉദ്യോഗസ്ഥർ മാനിന്റെ ജഡവും കുരുക്കും കണ്ടെടുക്കുകയായിരുന്നു.
പ്രതികളെ കോടതിയിൽ ഹാജരാക്കി റിമാൻഡ് ചെയ്തു. സംഭവത്തിൽ കൂടുതൽ പേർ ഉൾപ്പെട്ടിട്ടുണ്ടോയെന്ന് അന്വേഷിക്കുമെന്നും പൊലീസ് അറിയിച്ചു.
