വാഷിംഗ്ടൺ ഡിസി: പൈറേറ്റ്സ് ഓഫ് കരീബിയൻ സിനിമയിലൂടെ പ്രശസ്തനായ നടൻ തമായോ പെറി (49) കൊല്ലപ്പെട്ടു. സ്രാവിന്റെ ആക്രമണത്തിലാണ് തമായോ കൊല്ലപ്പെട്ടത്. ഹവായി ബീച്ചിൽ സർഫിംഗ് ചെയ്യുന്നതിനിടെ സ്രാവ് ആക്രമിക്കുകയായിരുന്നു.
ജൂൺ 23ന് ഉച്ചയ്ക്കാണ് അപകടം നടന്നത്. ഹവായി ബീച്ചിൽ സ്ഥിരമായി തമായോ സർഫിംഗിനായി എത്താറുണ്ടായിരുന്നു. ഇതിനിടയിലാണ് സ്രാവിന്റെ ആക്രമണം നടന്നത്. ഗുരുതരമായി പരിക്കേറ്റ തമായോയെ ബീച്ചിലെ രക്ഷാപ്രവർത്തകരെത്തി ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
സ്രാവുകളുടെ ആക്രമണത്തിൽ മനുഷ്യർ കൊല്ലപ്പെടുന്നത് അപൂർവ്വമാണെന്ന് ഓഷ്യൻ സേഫ്റ്റി ഉദ്യോഗസ്ഥർ പറഞ്ഞു. സംഭവത്തെ തുടർന്ന് സർഫിംഗിനായി എത്തുന്ന ആളുകൾക്കും വിനോദസഞ്ചാരികൾക്കും ജാഗ്രതാ നിർദേശം നൽകിയിട്ടുണ്ടെന്നും പ്രദേശത്ത് മുന്നറിയിപ്പ് ബോർഡുകൾ സ്ഥാപിച്ചിട്ടുണ്ടെന്നും അധികൃതർ അറിയിച്ചു.
