മലയാളികൾക്ക് ഒരുപാട് മനോഹര ഗാനങ്ങൾ സമ്മാനിച്ച സംഗീത സംവിധായകനാണ് മോഹൻ സിതാര. തൊട്ടതെല്ലാം പൊന്നാക്കിയ മാന്ത്രിക വിരലുകൾ. അദ്ദേഹത്തിന്റെ മാസ്റ്റർ പീസ് ഗാനങ്ങളിൽ ഒന്നാണ് ‘ശിവദം ശിവനാമം’. കൈതപ്രത്തിന്റെ വരികൾക്കൊപ്പം ഗാനഗന്ധർവൻ യേശുദാസിന്റെ ശബ്ദവും കൂടി ചേർന്നപ്പോൾ ഒരു ഗംഭീര ഗാനം പിറക്കുകയായിരുന്നു. എന്നാൽ ‘ശിവദം ശിവനാമം’ എന്ന ഗാനം ആദ്യം പാടിയത് എംജി ശ്രീകുമാർ ആയിരുന്നു. അതു വേണ്ടെന്നു വെച്ചതിന്റെ കാരണം തുറന്നു പറയുകയാണ് മോഹൻ സിതാര. ഒരു ഓൺലൈൻ മാധ്യമത്തിനു നൽകിയ അഭിമുഖത്തിലാണ് അദ്ദേഹത്തിന്റെ വെളിപ്പെടുത്തൽ.
“ശിവദം ശിവനാമം എന്ന പാട്ടിന്റെ കമ്പോസിംഗ് നടന്നത് ബാംഗ്ലൂർ ആയിരുന്നു. ആദ്യം ട്യൂൺ ഉണ്ടാക്കി. അത് കൈതപ്രം ആസ്വദിച്ച് കേട്ടിരുന്നു. അതിനുശേഷം അദ്ദേഹം വരികൾ എഴുതി. അതിമനോഹരമായാണ് തിരുമേനി വരികൾ എഴുതിയത്. വരികൾ കൊണ്ടാണ് ആ പാട്ട് ഇത്ര ഗംഭീരമായത്. ദാസ് സർ അത് മനോഹരമായി പാടുകയും ചെയ്തു. ആദ്യം എംജി ശ്രീകുമാറിനെ കൊണ്ടാണ് ആ പാട്ടു പാടിച്ചത്. ശ്രീകുമാറും അതിമനോഹരമായി പാടിയിരുന്നു. പക്ഷേ അതിനു മുൻപ്, ദാസ് സാറിനെ ഈ പാട്ടിനുവേണ്ടി ക്ഷണിച്ചിരുന്നു. ഉടനെ ഷൂട്ട് ചെയ്യേണ്ടതാണ്. പക്ഷേ ദാസ് സർ ഭയങ്കര തിരക്കിലായിരുന്നു. അങ്ങനെയാണ് എംജി ശ്രീകുമാറിനെ കൊണ്ട് പാടിപ്പിച്ചത്”.
“എം ജി ശ്രീകുമാറിനെ കൊണ്ട് ആ ഗാനം പാടിപ്പിച്ചതിന് ശേഷം സ്റ്റുഡിയോയ്ക്ക് പുറത്തേക്കിറങ്ങിയപ്പോൾ ദാസ് സാറിന്റെ കോൾ വരുന്നു. ‘ഇന്ന് ഞാൻ പാടാം, നീ ഫ്രീയാണോ’ എന്ന് അദ്ദേഹം ചോദിച്ചു. എനിക്ക് എന്തു ചെയ്യണം എന്ന് ഒരു പിടിയും കിട്ടിയില്ല. വീണ്ടും ഞാൻ ട്രാക്ക് മാറ്റി ദാസ് സാറിനെ കൊണ്ട് പാടിപ്പിക്കുകയായിരുന്നു. വല്ലാത്ത ഒരു അവസ്ഥയായിരുന്നു. ശ്രീക്കുട്ടനും അത് അറിയാം”-മോഹൻ സിത്താര പറഞ്ഞു.
