കൊച്ചി: ക്ഷേത്രാചാരാനുഷ്ഠാനങ്ങളിൽ തന്ത്രിക്കുള്ള അധികാരം അടിവരയിട്ടുറപ്പിച്ച് കേരളാ ഹൈക്കോടതി. ക്ഷേത്രത്തിലെ നിലവിലുള്ള ആചാരാനുഷ്ഠാനങ്ങളിൽ മാറ്റം വരുത്തണമെങ്കിൽ തന്ത്രിയുടെ സമ്മതത്തോടെ മാത്രമേ കഴിയൂ എന്ന് കേരളാ ഹൈക്കോടതി വിധിച്ചു.
തൃശൂർ ഇരിഞ്ഞാലക്കുട കൂടൽമാണിക്യം ക്ഷേത്രത്തിലെ കൂത്തമ്പലത്തിൽ കൂത്തും കൂടിയാട്ടവും നടത്താൻ അമ്മന്നൂർ കുടുംബാംഗങ്ങൾ അല്ലാതെയുള്ളവർക്കും അനുമതി നൽകാനുള്ള കൂടൽമാണിക്യം ദേവസ്വം മാനേജിംഗ് കമ്മിറ്റിയുടെ തീരുമാനം ഹൈക്കോടതി റദ്ദാക്കി.
കൂടൽമാണിക്യം ക്ഷേത്രത്തിലെ കൂത്തമ്പലത്തിൽ കൂത്തും കൂടിയാട്ടവും നടത്താൻ കുടുംബത്തിലെ അംഗങ്ങൾക്ക് പാരമ്പര്യ അവകാശമുണ്ട്. ഇത് ഒരു ആചാരവും അനുഷ്ഠാനവും ആയതിനാൽ ആ കുടുംബാംഗങ്ങൾ മാത്രമാണ് കൂത്തമ്പലത്തിൽ കൂത്തും കൂടിയാട്ടവും നടത്തുന്നത്. എന്നാൽ മറ്റ് കലാകാരന്മാർക്ക് ക്ഷേത്രത്തിൽ കൂത്തും കൂടിയാട്ടവും അവതരിപ്പിക്കാൻ അനുമതി നൽകിക്കൊണ്ട് ക്ഷേത്രം അധികൃതർ പ്രമേയം പാസാക്കുകയായിരുന്നു. ഈ പ്രമേയത്തെ ചോദ്യം ചെയ്തു കൊണ്ട് അമ്മന്നൂർ കുടുംബത്തിലെ അംഗങ്ങളാണ് കോടതിയെ സമീപിച്ചത്.
കൂത്തും കൂടിയാട്ടവും പണ്ടുമുതലേ പിന്തുടരുന്ന മതപരവും ആചാരപരവുമായ ആരാധനയുടെ ഭാഗമാണെന്നും ഒരു സ്ഥാനാരോഹണ ചടങ്ങിന് ശേഷം അവരുടെ കുടുംബാംഗങ്ങൾക്ക് മാത്രമേ അത് ചെയ്യാൻ കഴിയൂവെന്നും ഹർജിക്കാർ വാദിച്ചു. കൂത്തും കൂടിയാട്ടവും നടത്താൻ മറ്റുള്ളവരെ അനുവദിച്ചുകൊണ്ട് അവരുടെ ആചാരപരമായ അവകാശങ്ങളിൽ മാറ്റം വരുത്തുന്നത് നിയമവിരുദ്ധമാണെന്നും ഭരണഘടനയുടെ ആർട്ടിക്കിൾ 25, 26 ന്റെയും ദേവതയുടെയും ഭക്തരുടെയും അവകാശങ്ങളുടെയും ലംഘനമാണെന്നും അവർ വാദിച്ചു.
മതപരമായ ആചാരങ്ങൾ സംരക്ഷിക്കാൻ ഭരണഘടനാപരമായ ബാധ്യതയുണ്ടെന്നും ആചാരാനുഷ്ഠാനങ്ങൾ സംബന്ധിച്ച് മതമേഖലയിലെ വിദഗ്ധർ തീരുമാനിക്കേണ്ടതുണ്ടെന്ന് ഉറപ്പാക്കാനുള്ള ഭരണഘടനാപരമായ ബാധ്യതയുണ്ടെന്നും കോടതി നിരീക്ഷിച്ചു. കൂത്ത്, കൂടിയാട്ടം തുടങ്ങിയ ക്ഷേത്ര നൃത്തരൂപങ്ങൾ മതപരവും ആചാരപരവുമായ ചടങ്ങുകളാണെന്ന് കോടതി നിരീക്ഷിച്ചു. തന്ത്രിമാരുടെ സമ്മതമില്ലാതെ ഇതിന്റെ അവതരണ സ്വഭാവം മാറ്റുന്നത് സംബന്ധിച്ച് ദേവസ്വം മാനേജിംഗ് കമ്മിറ്റിക്ക് തീരുമാനമെടുക്കാനാകില്ലെന്നും കോടതി വ്യക്തമാക്കി.
തുടർന്ന് അമ്മന്നൂർ കുടുംബാംഗങ്ങൾ കൂടാതെയുള്ള മറ്റു കലാകാരന്മാർക്ക് ക്ഷേത്ര കൂത്തമ്പലത്തിൽ അനുമതി നൽകാനുള്ള കൂടൽമാണിക്യം ദേവസ്വം മാനേജിംഗ് കമ്മിറ്റിയുടെ തീരുമാനം ഹൈക്കോടതി റദ്ദാക്കി.
അമ്മന്നൂർ കുടുംബത്തിൽ പെടാത്ത കലാകാരന്മാർക്ക് കൂത്തും കൂടിയാട്ടവും അവതരിപ്പിക്കാനുള്ള കൂത്തമ്പലം തുറന്നുകൊടുത്ത നടപടി ചോദ്യം ചെയ്ത് അമ്മന്നൂർ പരമേശ്വരൻ ചാക്യാർ ഉൾപ്പെടെയുള്ളവർ സമർപ്പിച്ച ഹർജിയിലാണ് ജസ്റ്റിസുമാരായ അനിൽ കെ നരേന്ദ്രൻ, പി ജി അജിത്കുമാർ എന്നിവരടങ്ങിയ ഡിവിഷൻ ബെഞ്ചിന്റെ ഉത്തരവ്. അമ്മന്നൂർ കുടുംബത്തിന് കൂത്തമ്പലത്തിൽ കൂത്തും കൂടിയാട്ടവും നടത്താനുള്ള അവകാശത്തിൽ മാറ്റം വരുത്താനാകില്ലെന്ന് കോടതി പറഞ്ഞു.
കൂത്തമ്പലത്തിനുള്ളിൽ കാഴ്ചക്കാരെ അനുവദിക്കുമ്പോൾ ക്ഷേത്രത്തിൽ പിന്തുടരുന്ന മതപരവും ആചാരപരവുമായ ആചാരങ്ങൾ ലംഘിക്കാനാവില്ലെന്ന് കോടതി നിരീക്ഷിച്ചു.ക്ഷേത്ര ഭരണസമിതിയുടെ തീരുമാനത്തിന്റെ അടിസ്ഥാനത്തിൽ നിലവിലുള്ള മതപരമായ ആചാരം മാറ്റാൻ കഴിയില്ലെന്നും എന്നാൽ തന്ത്രിമാരുടെ സമ്മതത്തോടെ മാത്രമേ അത് ചെയ്യാൻ കഴിയൂ എന്നും കോടതി വ്യക്തമാക്കി.
കൂടൽമാണിക്യം ദേവസ്വം നിയമത്തിലെ 35-ാം വകുപ്പു പ്രകാരം മതപരമായ കാര്യങ്ങളിൽ തീരുമാനമെടുക്കാനുള്ള അന്തിമ അധികാരം തന്ത്രിമാർക്കാണെന്ന് കോടതി പരാമർശിച്ചു. നിയമത്തിന്റെ 10-ാം വകുപ്പ് മാനേജിംഗ് കമ്മിറ്റിയുടെ ചുമതലകൾ വിവരിക്കുന്നു.
“കൂടൽമാണിക്യം ക്ഷേത്രത്തിലെ കൂത്തമ്പലത്തിലെ കൂത്തും കൂടിയാട്ടവും മതപരവും ആചാരപരവുമായ ചടങ്ങാണ്. മുകളിൽ സൂചിപ്പിച്ച നിയമനിർദ്ദേശത്തിന്റെ( കൂടൽമാണിക്യം ദേവസ്വം നിയമം) വെളിച്ചത്തിൽ, നിയമത്തിന്റെ 35-ാം വകുപ്പിലെ വ്യവസ്ഥകൾ കണക്കിലെടുത്ത്, വഴിപാടായി ‘കൂത്തും’ ‘കൂടിയാട്ടവും’ വർഷം മുഴുവനും നടത്താമെന്ന ഹർജിക്കാരുടെ നിർദ്ദേശത്തിൽ തന്ത്രിമാരാണ് തീരുമാനമെടുക്കേണ്ടത്, തന്ത്രിമാരുടെ പ്രതികളുടെ സമ്മതം ലഭിച്ചാൽ ക്ഷേത്രാചാരങ്ങളെയും ആചാരങ്ങളെയും ഒരു തരത്തിലും ബാധിക്കാതെ തീരുമാനം നടപ്പാക്കാൻ കഴിയും ”, കോടതി പറഞ്ഞു
