മോഹൻലാൽ നായകനായെത്തുന്ന ആദ്യ റേഡിയോ സിനിമ റിലീസിന് ഒരുങ്ങുന്നു. ചിത്രം ജൂലായ് 19-ന് ക്ലബ് എഫ് എമ്മിലൂടെയാണ് റിലീസ് ചെയ്യുന്നത്. ‘ഏയ്ഡൻ-ദി എ ഐ സ്പിരിറ്റ്’ എന്ന് പേരിട്ടിരിക്കുന്ന ചിത്രത്തിൽ ബസ് ഡ്രൈവർ രഘൂത്തമൻ എന്ന കഥാപാത്രത്തിനാണ് മോഹൻലാൽ ശബ്ദം നൽകിയിരിക്കുന്നത്.
സിനിമയുടെ രചനയും സംവിധാനവും നിർവഹിച്ചിരിക്കുന്നത് പ്രിയരാജ് ഗോവിന്ദരാജാണ്. ചിത്രത്തിൽ മോഹൻലാലിനെ കൂടാതെ സുരേഷ് കൃഷ്ണ, സുധീർ കരമന, സുനിൽ സുഖദ, രാജേഷ് ശർമ, മഹേഷ് കുഞ്ഞുമോൻ എന്നിവരും ശബ്ദം നൽകുന്നുണ്ട്. ശബ്ദ സാന്നിധ്യത്തിലൂടെ ഒരു സിനിമ എന്ന പരീക്ഷണത്തിനാണ് മോഹൻലാലും മറ്റ് നടന്മാരും തയ്യാറായിരിക്കുന്നത്.
ചിത്രത്തിന് സംഗീതം നൽകിയിരിക്കുന്നത് ജോജു സെബാസ്റ്റ്യനാണ്. മ്യൂസിക് പ്രോഗ്രാമിംഗ് അഭിജിത് രവികുമാറാണ് നിർവ്വഹിച്ചിരിക്കുന്നത്. വിനീത്കുമാർ ടി എൻ ആണ് സൗണ്ട് ഡിസൈൻ നിർവ്വഹിച്ചത്. പണ്ടു കാലത്തെ റേഡിയോ നാടകങ്ങളെ ഓർമിപ്പിക്കും വിധത്തിലാണ് സിനിമ ഒരുക്കിയിരിക്കുന്നത്. പുതിയ സാങ്കേതിക വിദ്യകളുടെ പരീക്ഷണം കൂടിയാണ് ഈ ചിത്രം.
