തൊഴിലുറപ്പ് തൊഴിലാളിയായ ഗീതയോട് പ്രിയപ്പെട്ട നടി ആരാണെന്ന് ചോദിച്ചാൽ ഒറ്റ ഉത്തരമേയുള്ളൂ, മഞ്ജു വാര്യർ. നടിയെ നേരിട്ട് കാണണമെന്നും മഞ്ജുവിനെ പറ്റി എഴുതിയ കവിത ചൊല്ലികൊടുക്കണമെന്നും ഗീതയുടെ ദീർഘനാളത്തെ ആഗ്രഹമാണ്. ഇതറിഞ്ഞ വാർഡ് മെമ്പറായ ജിതേഷ് കുമാർ മഞ്ജു വാര്യരെ ചൊല്ലി കേൾപ്പിക്കാൻ കവിതയുമായി കാത്തിരിക്കുന്ന ഗീതയെപ്പറ്റി സമൂഹമാദ്ധ്യമങ്ങളിൽ പോസ്റ്റ് പങ്കുവെക്കുകയും ചെയ്തു.
പോസ്റ്റ് വൈറലായതോടെ വിവരം മഞ്ജുവിന്റെ ചെവിയിലും എത്തി. ഒടുവിൽ കഴിഞ്ഞ ദിവസം ഗീതയുടെ സ്വപ്നം സാക്ഷാത്കരിക്കുകയും ചെയ്തു. മഞ്ജു വാര്യരെ കാണുകയും കവിത നൽകുകയും മാത്രമല്ല, പ്രിയ താരത്തോട് കുശലാന്വേഷണം നടത്തി, കവിളിലൊരു മുത്തവും നൽകിയ ശേഷമാണ് ഈ ആരാധിക മടങ്ങിയത്.
പത്തനംതിട്ട അങ്ങാടിയ്ക്കൽ സ്വദേശിയായ ഗീത കുറച്ച് നാളുകൾക്ക് മുമ്പാണ് ഇഷ്ടതാരമായ മഞ്ജു വാര്യരെപ്പറ്റി പോയനാളുകൾ എന്ന പേരിൽ കവിതയെഴുതിയത്. 18ാം വയസിലാണ് ഗീത കവിത എഴുതി തുടങ്ങിയത്. ഇതുവരെ 50 ഓളം കവികൾ എഴുതിയിട്ടുണ്ടെങ്കിലും ഒന്നും പ്രസിദ്ധകരിച്ചിട്ടില്ല.
