മമ്മൂട്ടിയുടെയും മോഹൻലാലിന്റെയും എക്കാലത്തെയും മികച്ച ഒരുപിടി ക്ലാസിക് ചിത്രങ്ങൾ സമ്മാനിച്ച സംവിധായകനാണ് സിബി മലയിൽ. തനിയാവർത്തനം, സാഗരം സാക്ഷി, ഓഗസ്റ്റ് 1 തുടങ്ങി മികച്ച ചിത്രങ്ങൾ മമ്മൂട്ടിയുമൊത്ത് സിബി മലയിൽ ചെയ്തിട്ടുണ്ട്. എന്നാൽ കഴിഞ്ഞ 30 വർഷത്തിനിടെ ഒരു സിനിമ പോലും മമ്മൂട്ടിയെ നായകനാക്കി സിബി മലയിൽ സംവിധാനം ചെയ്തിട്ടില്ല. അതിന്റെ കാരണം തുറന്നു പറഞ്ഞിരിക്കുകയാണ് സംവിധായകൻ. ഒരു ഓൺലൈൻ മാധ്യമത്തിന് നൽകിയ അഭിമുഖത്തിലാണ് മമ്മൂട്ടിയുമൊത്ത് എന്തുകൊണ്ട് സിനിമ ചെയ്യുന്നില്ല എന്ന് സിബി മലയിൽ വ്യക്തമാക്കിയത്.
“അവരുമായി സിനിമ ചെയ്യുമ്പോൾ ഗംഭീരമായ ഒരു കഥ വേണം. സിനിമകൾ ചെയ്യുന്നതിൽ കുഴപ്പമില്ല. ഞാനും മമ്മൂട്ടിയും തമ്മിലുള്ള കോമ്പിനേഷനിൽ പ്രേക്ഷകർ പ്രതീക്ഷിക്കുന്ന തരത്തിൽ സിനിമയുണ്ടാവണം. മമ്മൂട്ടിയുമായി ഒന്ന് രണ്ട് സിനിമകൾ ആലോചിച്ചതാണ്. ചർച്ചകൾ നടന്നിരുന്നു, സ്ക്രിപ്റ്റ് വായിച്ച് ഇഷ്ടപ്പെട്ടതുമാണ്. പക്ഷേ, പ്രൊഡക്ഷൻ ഭാഗത്ത് നിന്നുണ്ടായ ചില പ്രശ്നങ്ങൾക്കൊണ്ട് മാറി പോയതാണ്”.
“പി പി ഗംഗാധരന്റെ ‘ജീവിതമെന്ന അത്ഭുതം’ എന്ന പുസ്തകമുണ്ട്. അതിനെ ആസ്പദമാക്കി ഒരു കഥ ഉണ്ടാക്കിയതാണ്. അത് മമ്മൂട്ടിക്ക് ഇഷ്ടപ്പെട്ടിരുന്നു. എന്നാൽ ആ സമയത്ത് അതിന്റെ പ്രൊഡ്യൂസറായി വന്നവരുടെ ഭാഗത്തുനിന്ന് ചില പ്രശ്നങ്ങൾ ഉണ്ടായി. അങ്ങനെ ആ പ്രോജക്ട് വേണ്ടെന്നു വയ്ക്കുകയായിരുന്നു. ഇപ്പോൾ വേണമെങ്കിലും മമ്മൂട്ടിയുടെ അടുത്ത് ചെല്ലാം. പക്ഷേ നല്ലൊരു കഥയുണ്ടാവണം. മമ്മൂട്ടിയും മോഹൻലാലുമൊക്കെ ഗംഭീര നടന്മാരാണ്. ചെറിയൊരു സംസ്ഥാനത്ത് ജനിച്ചത് കൊണ്ട് മാത്രം ലോകമൊട്ടുക്കെ ശ്രദ്ധിക്കപ്പെടാതെ പോയവർ. അവരുമായി സിനിമ ചെയ്യണം എന്നത് ഇന്നും ആഗ്രഹമാണ്”-സിബി മലയിൽ പറഞ്ഞു.
